Беларускіх «алігархаў» пазбаўляюць дамоў
8- 30.10.2007, 12:16
У Гомельскай вобласці паводле вынікаў праведзенай КДК праверкі выканання зямельнага заканадаўства вызвалена каля 90 самавольна занятых участкаў, знесеныя больш за 70 пазапраўна пабудаваных гаспадарчых пабудоў і металічных гаражоў. Пра гэта паведамілі ў прэс-службе Камітэта дзяржаўнага кантролю Гомельскай вобласці.
Да дысцыплінарнай адказнасці прыцягнутыя 26 службовых асоб абласной зямельнаўладкавальнай і геадэзічнай службы, а таксама абласнога камітэта прыродных рэсурсаў і аховы навакольнага асяроддзя. Складзеныя 62 адміністрацыйныя пратаколы, з іх 28 разгледжаныя. Агульная сума адміністрацыйнага штрафу склала 9 млн. рублёў.
Паводле інфармацыі прэс-службы, скасаваныя і прыведзеныя ў адпаведнасць з патрабаваннямі заканадаўства, якое рэгулюе зямельныя стасункі, сем рашэнняў мясцовых выканаўчых і распарадчых органаў, спыненыя дзве дамовы арэнды зямельных участкаў. Актыўная праца па вызваленні зямельных участкаў і зносу пазапраўных пабудоў, гаражоў працягваецца.
«Раней багатыя князі будавалі свае замкі стагоддзямі…»
Уладальнікі дарагіх катэджаў павінны прадставіць дэкларацыі аб прыбытках. Пра гэта заявіў у інтэрв'ю «Інтэрфаксу» старшыня Камітэта дзяржаўнага кантролю Менскай вобласці Уладзіслаў Цыдзік.
«Я спадзяюся, што падатковая інспекцыя ў супрацоўніцтве з праваахоўнымі органамі «раскруціць» шэраг пытанняў, якія тычацца ўладальнікаў камфартабельных катэджаў. Адкуль у чалавека з'явіліся сумы ў сотні тысяч даляраў? Раней багатыя князі будавалі свае замкі стагоддзямі. А цяпер палац, які ні ў чым не саступае вядомым палацам, узводзіцца за адзін сезон!», – заявіў службовец.
«Мы запатрабавалі 487 падатковыя дэкларацыя, апрацавалі 90 – усе знаходзяць аргументы, знаходзяць нейкую прыбытковую частку, сцвярджаюць, што грошы ўзялі ў пазыку. Мы праверым і заемадаўцаў – адкуль у грамадзян такія сродкі? Яны заробленыя мазалямі ці выкрадзеныя ў дзяржавы? Па гэтым кірунку мы 1 кастрычніка правялі нараду з кіраўніцтвам УУС Менаблвыканкама і інспекцыяй міністэрства па падатках і зборах. Мы паспрабуем даказаць, што выдаткі некаторых грамадзян на гэтую нерухомасць не адпавядаюць прыбыткам, адзначаным у падатковых дэкларацыях. Падключыцца АБЭП, ДФР і, думаю, мы даможамся ісціны. І эфекту», – заявіў Уладзіслаў Цыдзік.
На фота: Такімі бачаць дамы беларускіх «алігархаў» беларускія блогеры…
