Алесь Анціпенка: Тэма «выбараў» была маргінальнай
- 16.10.2008, 16:30
«Асвятленне ў дзяржаўнай прэсе «парламенцкіх выбараў» было «млявае, нецікавае і недраматычнае», - заявіў медыяэксперт Алесь Анціпенка, прэзэнтуючы 16 кастрычніка журналістам выніковы даклад «Асвятленне «парламенцкіх выбараў» у беларускіх СМІ».
Падчас маніторынгу адсочвалася 20 СМІ: тэлевізійныя і радыёпраграмы, рэгіянальная і агульнарэспубліканская прэса, інтэрнэт-версіі дзяржаўных і недзяржаўных выданняў. Маніторынг праводзіўся з 21 ліпеня па 12 кастрычніка 2008 года, паведамляе БелаПАН.
«Дзяржаўныя СМІ надзвычай невыразна асвятлялі выбарчую кампанію і не прыцягвалі да яе належнага ўвагі. Час і плошча, якія адводзілі дзяржаўныя СМІ перадвыбарчай тэматыцы, былі значна меншыя ці параўнальныя з той плошчай, якая адводзілася на прагноз надвор'я. Самы выразны прыклад — у перыяд з 1 па 15 жніўня Гомельскае абласное радыё адвяло тэме «выбараў» часу ў 12 раз менш, чым прагнозу надвор'я», — сказаў Алесь Анціпенка.
«Гэта азначае, што выбарчая тэматыка фактычна маргіналізавалася, што «выбары» не былі найважнейшай і найгалоўнейшай падзеяй палітычнага жыцця краіны. Гэта значыць, што палітычнае жыццё нашай краіны фактычна не з'яўляецца важнай тэмай для дзяржаўных СМІ», — лічыць эксперт.
Згодна з яго словамі, паводле асвятлення выбараў у дзяржаўных СМІ гэтая выбарчая кампанія паказала «селектыўнасць» усяго выбарчага працэсу.
«У цэнтр увагі дзяржаўных СМІ траплялі пяць ці шэсць суб'ектаў выбарчага працэсу. Пры гэтым прэзідэнту і ЦВК надавалася найбольшая ўвага. Дзяржаўныя СМІ не арганізавалі якіх-небудзь дэбатаў, яны не з'яўляліся форумам для выбаршчыкаў, гаворка ішла не пра розныя палітычныя платформы, а ўвага выбаршчыкаў канцэнтравалася на дасягненнях мясцовай улады ці беларускага ўрада», — сказаў А.Анціпенка.
«У беларускіх электронных СМІ не з'явілася ні воднай перадачы, прысвечанай непасрэдна выбаршчыкам, іх меркаванню, іх пункту гледжання», — канстатаваў эксперт.
«Такім чынам, дзяржаўныя медыі нічым не дапамаглі звычайным грамадзянам у тым, каб яны на падставе ўсебаковай інфармацыі з розных крыніцаў, рознабаковых каментароў маглі б зрабіць свой выбар», — лічыць А.Анціпенка.
«Дзяржаўныя СМІ звялі да мінімуму палітычную канкурэнцыю паміж рознымі палітычнымі сіламі і тым самым выключылі выбаршчыкаў з палітычнай барацьбы», — канстатаваў медыяэксперт.
