Фінькевіча вывезлі за 9-ы кіламетр
9- 17.10.2008, 9:00
Затрыманы ўчора ў Менску моладзевы лідэр быў адвезены супрацоўнікамі АМАПа за межы Менска.
Па словах актывіста, спачатку амапаўцы бязмэтава вазілі яго па горадзе, а псля вывезлі на Маскоўскую шашу і пакінулі там. Пры затрыманні амапаўцы пашкодзілі Фінькевічу мабільны тэлефон. Зваротна ў цэнтр горада ён дабіраўся на таксі.
Нагадаем, што актывіста апазіцыі затрымалі 16 кастрычніка ў 18.30 на вуліцы Інтэрнацыянальнай, недалёка ад Кастрычніцкай плошчы. Да яго пад'ехаў аўтамабіль УАЗ, з машыны выбеглі супрацоўнікі АМАПа, схапілі Фінькевіча і звезлі ў невядомым напрамку.
Арышт моладзевага лідэра можа быць звязаны з тым, што 16 кастрычніка ў Беларусі адзначаецца Дзень салідарнасці. У сувязі з гэтым у Менску праходзілі мірныя акцыі ў памяць аб рэпрэсаваных беларусах.
