Апазыцыянэрам адмовілі ў правядзенні пікетаў супраць будаўніцтва АЭС

Астравецкі раённы выканаўчы камітэт адмовіў грамаpскім актывістам Мікалаю Уласевічу і Івану Круку ў правядзенні на тэрыторыі Астравецкага раёну Гарадзенскай вобласці інфармацыйных пікетаў.

Заяўкі падаваліся на правядзенне ў лістападзе пяці інфармацыйных пікетаў (двух у Астраўцы, па аднаму ў Міхалішках, Варнянах і Гервятах) супраць пабудовы на тэрыторыі раёну атамнай электрастанцыі, нагадвае праваабарончы цэнтар «Вясна».

Грамадзка-палітычныя актывісты мелі намер давесці мясцоваму насельніцтву праўду пра ўсю небяспеку і наступствы пабудовы АЭС на тэрыторыі раёну, які на сёння ёсць адным з экалагічна чысцейшых у Беларусі і адным з найбольш перспектыўных для развіцця турызму.

Першы намеснік старшыні Астравецкага райвыканкаму В.А. Славінскі, які падпісаў адмову, знайшоў вельмі незвычайную для гэтага прычыну.

«... отказано, так как цели и способы проведения пикетирования превышают требования, изложенные в Законе Республики Беларусь от 30 декабря 1997 г. №114-3 “О массовых мероприятиях в Республике Беларусь», - паведамляецца ў адмове.

Іван Крук і Мікалай Уласевіч катэгарычна ня згодныя з такой дзіўнай трактоўкай заканадаўства і маюць намер дамагацца законнасці ў судовым парадку.