У КДБ выклікаюць жонак апазыцыйных палітыкаў
1- 18.11.2008, 9:40
14 лістапада Насту Чэрнік-Рымашэўскую, жонку сустаршыні аргкамітэту па стварэньні партыі Беларуская хрысціянская дэмакратыя Віталя Рымашэўскага, выклікалі ў КДБ для дачы паказаньняў.
Каля восьмай гадзіны вечара супрацоўнікі КДБ патэлефанавалі дадому сям’і Рымашэўскіх і настойвалі на візіце жонкі сустаршыні аргкамітэта партыі ў КДБ. Па словах Насты Чэрнік-Рымашэўскай, ёй не хацелі казаць, зь якой нагоды яе выклікаюць, але пасьля паведамілі, што, магчыма, па справе аб выбуху ў Менску 3-4 ліпеня. Пасьля таго, як Наста адмовілася прыйсьці ў КДБ, ёй прапанавалі іншы варыянт: супрацоўнікі могуць самі прыехаць за паказаньнямі да яе дадому ў гэты ж вечар. Зразумела, ад гэтага Наста таксама адмовілася.
Выклікі ў КДБ жанчына зьвязвае з працай яе мужа, які кіруе аргкамітэтам па стварэньні БХД.
