Нацбанку даручана забяспечваць крэдытаванне ў расейскіх рублях
9- 18.11.2008, 13:23
Прэм'ер-міністр Беларусі Сяргей Сідорскі даў даручэнне забяспечваць крэдытаванне паставак у расейскіх рублях у сувязі з планаваным наданнем расейскаму рублю статуту рэгіянальнай валюты.
Аб гэтым ён паведаміў, адказваючы на пытанні падчас беларускага інвестыцыйнага форума ў Лондане, перадае «Интерфакс».
«Рэгіянальнай валютай мог бы стаць расейскі рубель. Мы вітаем гэтую прапанову», - сказаў С.Сідорскі.
Ён удакладніў, што адпаведнае рашэнне было прынятае на сустрэчы кіраўнікоў дзяржаваў Беларусі і Расеі і некалькі разоў абмяркоўвалася прэм'ер-міністрамі двух краінаў.
«Апошні раз мы з Пуціным (прэм'ер-міністрам Расеі Уладзімірам Пуціным - ИФ) абмяркоўвалі гэтае пытанне некалькі дзён таму ў Малдове», - дадаў ён.
«Я даў даручэнне Нацыянальнаму банку распачаць працу па забеспячэнні крэдытных паставак за кошт расейскага рубля, каб забяспечыць яго папаўняльнасць», - сказаў С.Сідорскі.
Ён таксама паведаміў, што Беларусь працягвае перамовы з МВФ аб атрыманні крэдыту, выказаўшы ўпэўненасць, што крэдыт будзе дадзены.
«Гэты крэдыт патрэбны як Беларусі, так і ЕЗ. Пакуль праб'ем эканамічныя тромбы, і грошы паступяць у банкаўскую сістэму», - сказаў прэм'ер, адказваючы на пытанне, наколькі крытычнае для Беларусі атрыманне гэтага крэдыту.
