За адбіткамі пальцаў у Бабруйску ўжо ходзяць па дамах

Спачатку грамадзян выклікалі позвамі ў ваенкамат, зараз вось супрацоўнікі органаў сталі выязджаць адрасна.

Раніцай у кватэру пенсіянераў К. з'явіліся двое ў цывільным і заявілі, што іх сын павінен здаць адбіткі пальцаў.

– Мы з мужам толькі селі снедаць, калі заторгалася ручка дзвярэй. Жывем адны, дзеці нашы ўжо жанатыя. Падумалі, прыйшоў малодшы сын, у яго ёсць ключ. Добра хоць у вочка зірнула. Пад дзвярыма былі двое мужчын. Адзін сядзеў на кукішках. Я ведаю, так зэкі сядзяць. Страшна стала. "Адчыніце, міліцыя!"– пачула я, – распавядае сайту BulletinOnline.org Людміла Іванаўна.

Дзверы гаспадары ўсё ж адчынілі.

Не называючы сваіх прозвішчаў, не паказваючы пасведчанняў, візіцёры сталі распытваць аб старэйшым сыне гаспадароў, які ўжо некалькі гадоў з імі не жыве, хаця прапісаныя па дадзеным адрасе. Сказалі, што ён павінен здаць адбіткі пальцаў для ваенкамата.

Службовае пасведчанне было паказана толькі пасля настойлівага патрабавання гаспадыні.

З тлумачэнняў прышэльцаў вынікала, што яны супрацоўнікі Бабруйскага ізалятара часавага ўтрымання, а па кватэрах хадзіць іх начальства прымушае ў непрацоўны час. Атрымаўшы адмову, сышлі, гучна абураючыся: "Нам гэта трэба? Так і скажам!"

"Адкатваць пальчыкі" мужчынскаму насельніцтву Бабруйска сталі прапаноўваць яшчэ ў кастрычніку. Адбывалася гэта па-рознаму. Спачатку выклікалі позвамі ў ваенкамат, пасля супрацоўнікі органаў сталі выязджаць на мясцовасць з мэтай масавага ўзяцця адбіткаў пальцаў. Нядаўна пабывалі ў Бабруйским філіяле Беларускага эканамічнага ўніверсітэта. Дабраліся і да прамысловых прадпрыемстваў.

На днях рэдактара незалежнай гарадской газеты "Бабруйскі кур'ер" Анатоля Саноценку па тэлефоне запрашаў для дактыласкапавання прапаршчык з усё таго ж ІЧС. Пасля адмовы журналіста прыйсці, супрацоўнік па прозвішчы Шумахер такі дастаў яго дома і ўручыў адмысловую "позву".

– Ну не вяжуцца тут канцы з канцамі, – разважае "адпальцаваны" студэнт БДЭУ Арцём.– Калі для ваенкамата, то прычым тут следчы ізалятар? Калі для пошуку злачынца – чаму тады ў дзяржаўнай газеце ніякай аб'явы афіцыйнай няма? Калі сацыяльныя працаўнікі ходзяць на апытанне, ва ўсіх гарадскіх газетах дастаюць растлумачэннямі, што да чаго!