МВФ пакуль не дае крэдыт Беларусі. Перамовы працягнуцца ў снежні
17- 24.11.2008, 9:32
Улады Беларусі працягнуць кансультацыі з Міжнародным валютным фондам па пытанні вылучэння стабкрэдыта ў снежні гэтага года.
Аб гэтым паведамляецца ў прэс-рэлізе ўпраўлення інфармацыі Нацыянальнага банка Беларусі (НББ).
"Паспяхова скончыўся першы этап працы ўрада і Нацыянальнага банка з місіяй МВФ, якая знаходзілася ў Менску з канца кастрычніка 2008 года, над дамовай аб прадастаўленні нашай краіне крэдыту ў памеры 2 млрд даляраў ЗША", - сказана ў паведамленні.
"Працяг абмеркавання пытанняў, што маюць тэхнічны характар, чакаецца ўжо ў снежні бягучага года падчас наступнага візіту місіі МВФ у Беларусь", - адзначаюць у НББ.
Пасля ўзгаднення "усіх тэхнічных пытанняў", адпаведны пакет дакументаў будзе прадстаўлены Выканаўчаму савету МВФ для канчатковага сцвярджэння.
У НББ тлумачаць, што Беларусь "звярнулася за атрыманнем гэтага крэдыту ў мэтах павелічэння дзяржаўных золатавалютных рэзерваў і стварэння "падушкі бяспекі", неабходнай для стабільнай працы эканомікі ва ўмовах сусветнага фінансавага крызісу".
Як паведамлялася, місія МВФ па пытанні вылучэння Беларусі стабкрэдыта працавала ў Менску з 27 кастрычніка і пакінула Беларусь 22 лістапада.
Нагадаем, што нядаўна стала вядома аб адной з умоваў, выстаўленых МВФ беларускім уладам. Прадстаўнікі МВФ лічаць, што Беларусь павінная на 20 адсоткаў панізіць курс беларускага рубля. Беларускія перагаворшчыкі не згаджаліся. Таму перамовы, якія павінны былі скончыцца яшчэ 6 лістапада, доўжыліся на два тыдні даўжэй.
