Беларусь і Расея рыхтуюць «адзіны спіс» неўяздных
2- 26.11.2008, 14:30
Беларусь і Расея абмеркавалі пытанні падрыхтоўкі праекту міжурадавага пагаднення, датычнага спісу асобаў, уезд якіх на тэрыторыю двух дзяржаваў забаронены ці непажаданы.
Аб гэтым паведаміў агенцтву "Интерфакс-Запад" у дэпартаменце па грамадзянстве і міграцыі міністэрства ўнутраных справаў Беларусі.
"У Менску на паседжанні міждзяржаўнай беларуска-расейскай групы па міграцыйнай палітыцы была абмеркаваная неабходнасць прававой рэгламентацыі спісу асобаў, уезд якіх на тэрыторыю Беларусі і Расеі забаронены ці непажаданы", - паведамілі ў МУС.
"Беларускі бок адзначыў неабходнасць падрыхтоўкі міжурадавай дамовы аб агульным спісе неўяздных асобаў на тэрыторыю двух дзяржаваў. Расейскі бок выказаў намер у першым квартале 2009 года вывучыць магчымасць падрыхтоўкі гэтай дамовы", - паведамілі ў дэпартаменце.
У цяперашні час агульны спіс замежнікаў і асобаў без грамадзянства, уезд якіх забаронены ці непажаданы на тэрыторыю Беларусі і Расеі, складае каля 250 тысячаў, паведамілі ў дэпартаменце. Акрамя гэтага, у кожнай краіны ёсць "свой спіс неўяздных".
