Барадзін: «Лукашэнка мае намер істотна змяніць парадак дня паседжання савета «саюзнай дзяржавы»

Парадак дня паседжання Вышэйшага Дзяржаўнага савета «саюзнай дзяржавы» Беларусі і Расеі, якое мае адбыцца у канцы цяперашняга года, будзе істотна зменены. Аб гэтым паведаміў журналістам дзяржсакратар «саюзнай дзяржавы» Павал Барадзін пасля сустрэчы з Аляксандрам Лукашэнкам.

"Мы вельмі падрабязна абмеркавалі пытанне аб неабходнасці ўнясення істотных зменаў у парадак дня паседжання, якое мае адбыцца. Парадак будзе дастаткова шчыльным", - цытуе заяву Барадзіна "Интерфакс".

Падчас сустрэчы, паінфармаваў Барадзін, былі абмеркаваныя пытанні, датычныя развіцця гандлёва-эканамічнага супрацоўніцтва ў межах «саюзнай дзяржавы». "Па выніках цяперашняга года таваразварот паміж Беларуссю і Расеяй перавысіць 30 мільярдаў даляраў. Гэта знакавы рост", - сказаў дзяржсакратар.

Паводле яго словаў, на сустрэчы таксама ўзнімаліся пытанні, датычныя разгляду на паседжанні, якое мае адбыцца, ВДС ваенна-тэхнічнага, знешнепалітычнага супрацоўніцтва.

"Абмеркаваныя таксама пытанні выканання рашэнняў Вышэйшага Дзяржсавета", - сказаў Барадзін. Паводле яго словаў, Лукашэнка падтрымаў намер выразна паставіць пытанні перад камісіямі па канстытуцыйным акце, адзінаму аплатнаму сродку, адзінай коштавай палітыцы, паліўна-энергетычнаму балансу, балансу сельскагаспадарчай прадукцыі.

Таксама падчас сустрэчы былі абмеркаваныя пытанні «саюзнага» бюджэту.

"Як вы ведаеце, у наступным годзе «саюзны» бюджэт перавысіць 5 мільярдаў расейскіх рублёў. Рост бюджэту на 20% - гэта знакавы рост", - заявіў дзяржсакратар.