У Менск прыбывае місія Міжнароднага валютнага фонда

8 снежня ў Менск прыбывае місія тэхнічнага садзеяння па пытаннях грашова-крэдытнай палітыкі Міжнароднага валютнага фонда.

Аб гэтым БелаПАН паведамілі ў беларускім прадстаўніцтве МВФ.

Эксперты будуць знаходзіцца ў Беларусі па запрашэнні Нацыянальнага банка да 15 снежня. Пасля у Менск павінная прыбыць місія МВФ, якая працягне перамовы з прадстаўнікамі ўрада па пытанні прадастаўлення Беларусі стабілізацыйнага крэдыту ў 2 млрд. даляраў. Чакаецца, што місія прыбудзе 15 снежня.

З просьбай аб прадастаўленні крэдыту Беларусь звярнулася да МВФ у сярэдзіне кастрычніка. Як растлумачылі ў Нацбанку, крэдыт патрэбен для "павелічэння дзяржаўных золатавалютных рэзерваў і стварэння "падушкі бяспекі", неабходнай для стабільнай працы эканомікі ва ўмовах сусветнага фінансавага крызісу".

Першы раўнд перамоваў па крэдыце праходзіў з 27 кастрычніка па 22 лістапада, падчас візіту ў Менск місіі МВФ. Як заявіў пасля ад'езду місіі першы намеснік старшыні ўпраўлення Нацбанка Павел Калаўр, беларускі бок пазітыўна ацэньвае ход перамоваў з МВФ і спадзяецца на завяршэнне іх у снежні. Пры гэтым чыноўнік не пацвердзіў і не аспрэчыў інфармацыю аб тым, што ў якасці адной з умоваў вылучэння крэдыту МВФ прапаноўвае 20-адсоткавую дэвальвацыю беларускага рубля. Па словах П.Калаўра, МВФ не прад'яўляе Менску цвёрдых умоваў, а зважае на неабходнасць адэкватнай карэктоўкі курсу з улікам змены абменных курсаў іншых валют.