Новы генпракурор супраць прадпрымальнікаў
3- 18.02.2008, 9:47
Прызначаны генеральным пракурорам былы кіраўнік Канстытуцыйнага суду Рыгор Васілевіч даў сваё першае інтэрв'ю на новай пасадзе. Тэму абраў і для сябе бяспечную, і для грамадства актуальную – канфлікт вакол перарэгістрацыі індывідуальных прадпрымальнікаў у ПУПы.
З нагоды дамаганняў індывідуальных прадпрымальнікаў на перагляд магчымага кола асоб, якіх яны прыцягваюць да ажыццяўлення прадпрымальніцкай дзейнасці ў якасці наёмных працаўнікоў, «Советская Белоруссия» звярнулася да Генеральнага пракурора Рэспублікі Беларусь Васілевіча з просьбай пракаментаваць наяўную сітуацыю і выказаць сваю пазіцыю.
– Рыгор Аляксеевіч, як вы ацэньваеце юрыдычны бок пытання?
– Падкрэслю, што задачай органаў пракуратуры краіны з'яўляецца нагляд за дакладным і аднастайным выкананнем дзейнага заканадаўства і найперш законаў, дэкрэтаў, указаў прэзідэнта.
Як вядома, указам ад 29 снежня 2006 года № 760 было прадугледжанае, што дзейнасць індывідуальнага прадпрымальніка (ІП) з 1 студзеня 2008 года можа здзяйсняцца толькі з прыцягненнем блізкіх сваякоў (муж (жонка), бацькі, дзеці, усынавіцелі, усыноўленыя (удачароныя), родныя браты і сёстры, дзед, бабка, унукі).
У выпадку, калі індывідуальны прадпрымальнік хоча выкарыстоўваць працу іншых асоб, то ён павінен абраць іншую арганізацыйна-прававую форму працы, напрыклад прыватнае ўнітарнае прадпрыемства.
Вядома, прынятыя рашэнні ў вызначанай меры змяняюць які склаўся ўклад працы індывідуальных прадпрымальнікаў. Аднак прынятае рашэнне павінна быць выкананае. Пры гэтым важна мець на ўвазе, што ўказ выдадзены 29 снежня 2006 года і індывідуальным прадпрымальнікам быў прадстаўлены цэлы год для вырашэння ўсіх сваіх пытанняў, уключна змяненне свайго статусу з ІП на юрыдычную асобу, прыём новых працаўнікоў, то бок, блізкіх сваякоў, аказанне дапамогі ў працаўладкаванні раней прынятым на гэтую працу асобам.
Нават з пазіцый канстытуцыйнага права як больш тонкай матэрыі нацыянальнай прававой сістэмы скажу, што ўсталяванне такога пераходнага перыяду тэрмінам больш за адзін год з'яўляецца ідэальным, яно дазваляе завяршыць фінансавы год і падрыхтавацца да новых умоў.
