Лукашэнка Пуціну пра Косава: «Позна ўжо песні спяваць»

Аляксандр Лукашэнка лічыць прыпозненай рэакцыю Расеі на падзеі, якія адбываюцца на Балканах.

"Яшчэ раз падкрэсліваю – позна, працэс даўно пачаўся, ён ужо канчаецца. Мы "б'ём па хвастах". Тады трэба было абараняць Югаславію. Я вельмі добрае ведаў тую сітуацыю – Расеі тады не каштавала вялікіх высілкаў супрацьстаяць той агрэсіі, якая здзяйснялася супраць брацкага нам народа", – заявіў А.Лукашэнка ў панядзелак тэлеканалу Russia Today.

"Магу сёння сказаць тым, хто шкадаваў і быў супраць бамбёжкі Югаславіі: ці не позна мы за гэта ўзяліся? Вось тады трэба было не дапусціць дзяльбы Балкан, і тады трэба было абараняць Югаславію. І ў нас з Расеяй для гэтага ўсё было. Сёння позна "песні спяваць", – сказаў кіраўнік Беларусі.

Паводле яго слоў, "працэс ужо пачаўся даўно, ён ідзе".

"Чарнагорыя сышла, іншыя краіны сышлі. Заставалася Косава. Гэты ж працяг таго расколу. Мы страцілі свой уплыў там ужо даўно. Нам нельга было гэтага дапусціць – і сёння не было б пытанняў па незалежнасці", – адзначыў А.Лукашэнка. Пры гэтым ён спытаў: "Ці можам мы паўплываць на гэты працэс? Не, мы не можам, давайце скажам пра гэта адкрыта".

Акрамя таго, А.Лукашэнка звярнуў увагу на дзеянні Еўропы па пытанні Косава. "Так праблемы не вырашаюцца. Еўропа паводзіць сябе ў гэтым плане, я не кажу пра амерыканцаў, нават у нашым еўрапейскім доме несалідна", – сказаў прэзідэнт.

"Паўсюль падвойныя стандарты. Яны папракаюць нас, найперш Расею, што няправільная пазіцыя па Абхазіі, па Паўднёвай Асеціі, Прыднястроўі. А гэта што – правільна? Таму ўсе гэтыя развагі, якія ідуць ад нас і ад Расеі, абсалютна справядлівыя", – заявіў ён.

Лукашэнка бачыць Беларусь самадастатковай і незалежнай краінай

Аляксандр Лукашэнка ў будучыні бачыць беларускую дзяржаву моцнай, самадастатковай і насамрэч незалежнай.

"Сваю краіну я бачу стабільнай дзяржавай, дзе праз 10 гадоў будуць жыць не 10 млн, а 13 млн чалавек, дай Бог. А нам трэба 25 – 30 млн насельніцтва на гэтай зямлі, тады гэта будзе поўная незалежнасць і суверэнітэт", – заявіў А.Лукашэнка ў панядзелак у інтэрв'ю тэлеканалу Russia Today.

Ён таксама сказаў, што "хацеў бы, каб тут жыла больш людзей, каб Беларусь была багатай краінай, каб гэта была дзяржава з маладым тварам, каб тут было больш моладзі".

"Я хачу, каб ніколі мы сваім суседзям праблем не падкідалі, ніколі ні Расеі, ні Польшчы, ні Прыбалтыцы, ні Украіне мы праблем не прыносілі. І хачу, каб такой краіна і заставалася. Каб яна была ганарлівай, самадастатковай, і незалежнай", – заявіў А.Лукашэнка.