Беларуская сірата Таццяна Казыра: «Я жадаю застацца ў Амерыцы. Тут мая сапраўдная сям'я» (Відэа)

16-гадовая беларуска Таццяна Казыра паведаміла ў інтэрв'ю амерыканскім СМІ, што вырашыла падоўжыць сваё знаходжанне ў ЗША з-за сямейных праблем на радзіме.

У тым ліку, беларуска распавяла аб выпіваючым бацьке, маці, якую ніколі не бачыла і хворай бабулі, якой цяжка прыглядаць за ўнучкай.

Адвакат службы іміграцыі Сан-Францыска Крыстофер Кероскі заявіў у інтэрв'ю каліфарнійскаму выданню “Santa Rosa Press Democrat”, што беларуская школьніца Таццяна Казыра знаходзіцца ў ЗША на законных падставах, паколькі яе турыстычная віза сапраўдная да лістапада.

“Ніхто не аказвае на дзяўчынку ціску, і ніхто не прымушае яе ні да якіх дзеянняў”, -- падкрэсліў у гутарцы з журналістамі Кероскі. Па ягоных словах, дзяўчынка знаходзіцца ў амерыканскай сям'і, якую любіць і ведае ўжо 10 гадоў.

Сама Таццяна Казыра аспрэчыла заявы, што амерыканская сям'я пакідае яе ў Амерыцы супраць яе волі. " Я люблю гэтую сям'ю. І я жадаю застацца трохі даўжэй. Гэта мая сапраўдная сям'я", - заявіў Таццяна Казыра.

Па словах адваката, сваё рашэнне застацца ў амерыканскай сям'і Таццяна абгаварыла па тэлефоне з бабуляй-апякункай, і, дарэчы, атрымала на гэта згоду.

“Бабуля хацела, каб дзяўчынка засталася ў Амерыцы, -- кажа Кероскі. – Гэта яны абмяркоўвалі шмат раз”.

У той жа час, група дзяцей, у складзе якой беларуска прыбыла ў ЗША, 10 жніўня выляцела ў Беларусь. У Амерыцы застаўся адзін з суправаджалых групы да высвятлення акалічнасцяў. Па меркаванні амерыканскіх арганізатараў штогадовых паездак беларускіх дзяцей у ЗША, гэта апошні іх візіт у Амерыку, бо беларускія ўлады забароняць падобныя праекты.