Апошняя дыктатура Еўропы збіраецца святкаваць Дзень дэмакратыі
10- 12.09.2008, 13:00
«Савет рэспублікі» «нацыянальнага сходу» падтрымаў прапанову Міжпарламенцкага саюза (МПС) аб святкаванні 15 верасня Міжнароднага дня дэмакратыі.
Ва ўпраўленні інфармацыі сакратарыяту «савета рэспублікі» адзначылі, што «Беларусь актыўна ўзаемадзейнічае з ААН і МПС, з'яўляецца ініцыятарам прыняцця некалькіх рэзалюцыяў Генасамблеі ААН, імкнецца больш поўна забяспечваць абарону дэмакратычных правоў і свабодаў сваіх грамадзянаў».
Рашэнне аб усталяванні новага свята прынятае Генеральнай асамблеяй ААН у канцы 2007 гады.
Нагадаем, што рэжым Лукашэнкі, які называюць «апошняй дыктатурай Еўропы», міжнародная супольнасць абвінавачвае ў парушэнні правоў чалавека, незахаванні прынцыпаў свабоды слова, свабоды асацыяцыяў і свабоды сходаў. На працягу 14 гадоў кіравання Аляксандра Лукашэнкі ўсе выбары, якія праходзілі ў краіне, былі прызнаныя несвабоднымі і несправядлівымі. У 1999-2000 гадах у Беларусі зніклі лідэры беларускай апазіцыі і журналіст. У датычнасці да іх знікненняў і забойстваў міжнародная супольнасць падазрае вышэйшае кіраўніцтва краіны.
