Заява прэзідыўма Палітрады АДС у сувязі cа стварэннем кансультатыўнага савета пры адміністрацыі Лукашэнкі

У апошні час у асобных як незалежных, так і дзяржаўных СМІ з'явілася інфармацыя аб пашырэнні кантактаў улады з прадстаўнікамі дэмакратычнай апазіцыі.

У прыватнасці, аб уключэнні прадстаўнікоў шэрагу палітычных партый і грамадскіх аб'яднанняў, што ўваходзяць у АДС, у Грамадска-кансультатыўны савет пры Адміністрацыі прэзідэнта, які ўзначаліў кіраўнік Адміністрацыі Ўладзімір Макей. У сувязі з гэтым Прэзідыўм Палітрады АДС лічыць неабходным заявіць:

- ніякіх афіцыйных прапановаў аб накіраванні сваіх прадстаўнікоў у вышэйназваны Савет суб'екты АДС не атрымлівалі;

- статут, паўнамоцтвы і склад пазначанай структуры застаюцца незразумелымі;

- адзнаку дадзенаму органу можна будзе даць толькі зыходзячы з пэўнага выніку ягонай дзейнасці па дэмакратызацыі ўсіх сфер грамадска-палітычнага жыцця.

Прэзідыўм таксама заяўляе, што дэмакратычныя сілы гатовыя да адкрытага транспарэнтнага дыялогу з уладамі па актуальных праблемах, якія хвалююць беларускае грамадства, што адлюстравана ў стратэгіі дзейнасці АДС, прынятай на апошнім Кангрэсе прыхільнікаў дэмакратычных змен у 2007 годзе.