Лукашэнка: Ва ўсім вінаваты МВФ, але дэвальвацыю ўсё роўна трэба было праводзіць

Толькі праз тыдзень беларускі дыктатар пракаментаваў факт дэвальвацыі беларускага рубля.

"Міжнародны валютны фонд прапанаваў Беларусі добры крэдыт, нават лепш, чым дала Расея. Але было два патрабаванні: не павышаць заработную плату, не раздаваць беларускія рублі, таму што народ пайдзе мяняць іх на даляры ў абменніках. Хоць мы не зусім пагадзіліся, але знайшлі кампраміс. І другое - каб мы на 20% разава дэвальвавалі рубель. Гэта было патрабаванне МВФ.

І амаль за тры мільярды даляраў, якія яны нам прапанавалі, на гэта трэба было ісці. Тым больш, што дэвальвацыю нам трэба было і так ажыццяўляць у сілу нашай экспартаарыентаванай эканомікі", -- заявіў Лукашэнка, каментуючы сітуацыю на валютным рынку падчас кадравых прызначэнняў.

У той жа час, першапрычынай праведзенай дэвальвацыі А.Лукашэнка лічыць неабходнасць падтрымкі айчынных прадпрыемстваў-экспарцёраў. "Па-першае, Расея - наш буйны гандлёвы партнёр, і нашы экспарцёры пры моцным беларускім рублі пачалі несці вялікія страты пры гандлі на яе рынках. Таму нам прыйшлося пайсці на гэты крок. І лепш было здзейсніць дэвальвацыю аднамомантна. Кошт даляра ў сярэднім узрос на 400 рублёў, гэта параўнальна няшмат, але мы падтрымалі вытворцаў", - сказаў кіраўнік беларускай дзяржавы.

"Галоўнае цяпер - вытворчасць, бо будзе вытворчасць - будзе і рубель, будзе ўсё. Не будзе вытворчасці - не будзе і рубля", - дадаў прэзідэнт.

Менавіта гэтыя дзве прычыны - неабходнасць падвышэння канкурэнтаздольнасці на расейскім рынку і патрабаванне МВФ - і сталі перадумовай праведзенай дэвальвацыі, рэзюмаваў прэзідэнт.

Пры гэтым А. Лукашэнка заклікаў людзей да спакою: "Усе задаюцца пытаннем - а як далей будзе? Далей будзе нармальна. Бегчы ў абменнікі не трэба".

Па ягоных словах, беларусам не варта "бегчы ў абменнікі і купляць па ашалелых коштах даляры". "Не вядома, што яшчэ будзе з далярам і еўра. Калі хтосьці хоча ўкласці свае грошы ў тавары - гэта правільна. Але купляць тры, пяць, дзесяць тэлевізараў або лядоўняў з разлікам на тое, што гэта добрае ўкладанне сродкаў, - гэта поўная дурасць, таму што кошты на тавары падаюць. Грошы трэба трымаць у банках", - сказаў А.Лукашэнка.

Беларускі кіраўнік лічыць, што ў наступным сітуацыя стабілізуецца. "Мы нават разлічваем, што нам трэба будзе ўмацоўваць рубель, а даляр стане танней. Будзе ўсё залежаць ад насельніцтва і ад таго, як будзе складацца становішча на рынку. І потым, у Беларусі ўсе жа за рубель жывуць, ды мы і цяпер павялічваем прывабнасць нашай валюты", - падрэзюмаваў А.Лукашэнка.