Прагнозы аб тым, што Лукашэнку чакае лёс Мілошавіча, пацвярджаюцца

Заява прадстаўніка Еўракамісіі пра тое, што ўдзел Лукашэнкі ў новых прэзідэнцкіх выбарах супярэчыць дэмакратычным прынцыпам, прагучала не проста так.

«Прагнозы аб тым, што Лукашэнку ні ў якім выпадку не будуць пакідаць ля ўлады, і што яго чакае лёс, падобны на лёс Мілошавіча, пацвярджаюцца», - заявіў 15 снежня карэспандэнту ІА REGNUM намеснік дырэктара Цэнтра украіністыкі і беларусістыкі Маскоўскага дзяржаўнага ўніверсітэта імя Ламаносава Багдан Безпалька, каментуючы заяву ананімнага супрацоўніка Еўракамісіі, па словах якога, удзел Аляксандра Лукашэнкі ў наступных прэзідэнцкіх выбарах у Беларусі будзе супярэчыць «дэмакратычным прынцыпам».

«Гэты кулуарны каментар дастаткова выразна даў зразумець, што бюракратыя і эліта Еўрапейскага звяза не настроеная на тое, каб Лукашэнка заставаўся ля улады нават пры ўмове, што ён будзе весці краіну ў заходнія структуры», - лічыць эксперт.

«На думку ЕЗ, Беларусь і без таго знаходзіцца ў дастаткова няпэўным становішчы, заціснутая паміж расейскімі алігархамі з аднаго боку, і ЕЗ і МВФ - з другога. З пункту гледжання заходніх аналітыкаў, Беларусі ў любым выпадку прыйдзецца ісці на Захад, паколькі гэты шлях для яе больш прымальны, чым курс на патрапленне пад кантроль расейскіх алігархаў. Аднак, магчыма, уся гэтая гісторыя ў пэўнай меры з'яўляецца правакацыяй, накіраванай на заспакаенне расейскай эліты з мэтай заваяваць яе прыхільнасць пасля ўсіх несяброўскіх крокаў, якія беларуская ўлада рабіла ў апошні час. Ці, наадварот, не рабіла», - адзначыў палітолаг.

«Гэта датычыць і непрызнання Паўднёвай Асеціі і Абхазіі, і сустрэчы Лукашэнкі з Віктарам Юшчанкам і Папам Рымскім, і шэрагу іншых дзеянняў. Так што зараз варта назіраць за развіццём падзеяў з мэтай зразумець, што гэты кулуарны каментар хацеў данесці да ўлады і грамадства», - падвёў вынікі Багдан Безпалька.

Як раней паведамлялася, падчас паездкі групы беларускіх журналістаў у Брусэль, якая праходзіла з 7 па 11 снежня, ананімны прадстаўнік Еўракамісіі заявіў прэсе, што ўдзел Аляксандра Лукашэнкі ў наступных прэзідэнцкіх выбарах у Беларусі супярэчыць «дэмакратычным прынцыпам». Паводле інфармацыі агенцтва БелаПАН, ён таксама заявіў, што Беларусь мае патрэбу ў знешнеэканамічнай дапамозе, і калі яна не зоймецца правядзеннем «дэмакратычных рэформаў», дык патрапіць пад кантроль расейскіх алігархаў.