Падатковая сістэма будзе ўключаць 30 плацяжоў, ПДВ дакладна падвышаецца

Дэпутаты «палаты прадстаўнікоў» аднагалосна прынялі ў першым чытанні праект бюджэту на 2010 год.

Праект бюджэту прадугледжвае адмену чатырох падаткаў: збору ў рэспубліканскі фонд падтрымкі вытворцаў сельскагаспадарчай прадукцыі; падатку на набыццё аўтатранспартных сродкаў; мясцовага падатку з продажаў тавараў у рознічным гандлі; мясцовага збору з карыстальнікаў за паркоўку транспартных сродкаў у спецыяльна абсталяваных месцах.

У мэтах кампенсавання прыбыткаў бюджэту, звязанага з адменай гэтых падаткаў, стаўка падатку на дададзеную вартасць падвышаецца з 18 да 20%. Гэта забяспечыць дадатковыя паступленні ў бюджэт на суму ў 1,7 трлн. рублёў, сказаў міністр фінансаў Беларусі Андрэй Харкавец, прадстаўляючы праект бюджэту.

Да цяперашняга часу, адзначыў міністр, ужо адмененыя 17 малаэфектыўных падаткаў і збораў, якія таксама аказвалі негатыўны ўплыў на эканоміку, аб'яднаныя плацяжы, якія маюць падобныя падатковыя базы, паведамляе БелТА.

Падатковая сістэма Беларусі пасля ўступлення ў сілу Асаблівай часткі Падатковага кодэкса будзе ўключаць 30 стандартных плацяжоў. Пры гэтым звычайны падаткаплацельшчык будзе выплачваць толькі 5 з іх - ПДВ, падатак на прыбытак, падатак на нерухомасць, зямельны і экалагічны падаткі.

Паводле інфармацыі міністра, агульная сума прыбыткаў кансалідаванага бюджэту на 2010 год прагназуецца ў аб'ёме 53 трлн. рублёў (30,4% да ВУП). Прыбыткі рэспубліканскага бюджэту прадугледжваюцца ў суме 35,5 трлн. рублёў (120,7% да чаканага ўзроўню 2009 года), піша БелаПАН.

Выдаткі кансалідаванага бюджэту на 2010 год прагназуюцца ў аб'ёме 55,7 трлн. рублёў (31,9% да ВУП). Выдаткі рэспубліканскага бюджэту сфармаваныя ў суме 38 трлн. рублёў (на 23,5 % больш за узровень цяперашняга года).