Дэпутат Эўрапарлямэнту Ян Вірсма абураны дзеяньнямі беларускіх уладаў

Дэпутат Эўрапарлямэнту ад Нідэрляндаў Ян Марынус Вірсма заклікаў беларускія ўлады зьняць абмежаваньні на аздараўленьне беларускіх дзяцей за мяжой.

Аб гэтым ён заявіў падчас сустрэчы зь беларускім амбасадарам у Брусэлі Уладзімерам Сянько, перадае «Радыё Свабода».

Як паведамляюць нідэрляндзкія інфармацыйныя агенцыі, Ян Вірсма выказаў незадаволенасьць у сваёй краіне ў зьвязку з прыпыненьнем аздараўленьня чарнобыльскіх дзяцей на Захадзе. Паводле ягоных слоў, дзяржавы ЭЗ павінны прыняць сумеснае рашэньне па гэтым пытаньні.

Апрача таго Вірсма паспрачаўся з амбасадарам Сяньком адносна праблем беларускай грамадзянскай супольнасьці. Сянько заявіў аб «кантрпрадуктыўнасьці» «дэмакратычна апантанай» эўрапейскай палітыкі адносна Беларусі. Вірсма, у сваю чаргу, падкрэсьліў, што галоўнай умоваў для аднаўленьня паўнавартасных дачыненьняў Эўразьвязу і Менску застаюцца патрабаваньні аб працягу палітычных рэформ.