Апошняя дыктатура Еўропы павінная знікнуць

19.03.2009, 9:40

18 сакавіка, у трэцюю гадавіну «прэзідэнцкіх выбараў» у Беларусі, вынікі якіх былі сфальсіфікаваныя ўладамі, у дзясятках гарадоў Еўропы прайшлі акцыі пад лозунгам «Дайце голас беларусам!».

Акцыі арганізаваныя міжнароднай моладзевай арганізацыяй JEF-Europe (Маладыя Еўрапейскія Федэралісты).

«18 сакавіка ва ўгодкі сфальсіфікаваных выбараў Лукашэнкі моладзь усёй Еўропы правяла вулічныя акцыі. Мы завязвалі роты помнікам у еўрапейскіх гарадах і прымацоўвалі да іх плакаты з надпісамі на розных мовах: «Надыйшоў час перамен. Надыйшоў час свабоднай Беларусі!». Беларуская дыктатура існуе ўжо 15 год, а Еўразвяз дагэтуль не мае зразумелай палітыкі адносна сітуацыі ў Беларусі», -- заявілі арганізатары акцыі.

Агульнаеўрапейская акцыя ў падтрымку правоў беларусаў праводзіцца ўжо чацвёрты год запар. У гэты раз акцыя была прымеркаваная да пытання знешняй палітыкі Еўразвяза.

«Еўрапейская моладзь будзе працягваць барацьбу за дэмакратыю ў Беларусі. Летась мы адзначалі значныя зрухі ў бок дэмакратызацыі ў Беларусі, але зараз Менск далёкі ад істотных станоўчых зменаў.

Брусэль павінен цвёрда заявіць, што свабода прэсы і няўрадавых арганізацый і, перш за ўсё, павага правоў чалавека і апазіцыі, з'яўляецца неабходнай умовай пачатку ўзаемавыгадных адносінаў з Еўропай і візітаў беларускага кіраўніцтва ў Еўропу. 18 сакавіка мы нагадалі нашым лідэрам і грамадзянскай супольнасці, што Еўрапейскі кантынент не свабодны ад дыктатур», -- заяўляе каардынатар акцыі Тоні Джыгліана.

Прэзідэнт JEF-Europe Сэмюэль Пі адзначыў, што сёння, напярэдадні выбараў у Еўрапейскі Парламент, важна зразумець, што «сітуацыя ў Беларусі - прыклад поўнай паразы палітыкі Еўразвяза па пашырэнні свабоды і дэмакратыі».