Ва Ўкраіне пратэставалі супраць удзелу аўтарытарнай Беларусі ў праграме «Ўсходняе партнёрства»

25 сакавіка ў Кіеве грамадскія актывісты правялі пікетаванне амбасады Рэспублікі Беларусь ва Ўкраіне.

Удзельнікамі акцыі сталі вернікі евангельскай царквы "Новае жыццё" і моладзевай ініцыятывы "Моладзевая платформа", перадае БелаПАН.

Як паведамляе інтэрнэт-сайт ініцыятывы "Моладзевая платформа", такім чынам украінцы выказалі сваю падтрымку і выявілі салідарнасць з хрысціянамі Беларусі, на якіх здзяйсняюць ціск улады. Украінцы звярнулі ўвагу, што з Беларусі былі дэпартаваныя пастар Яраслаў Лукасік і біскуп Веніямін Брух, пацярпелі ад пераследу вернікі царквы "Новае жыццё".

"У краіне стала ствараюцца перашкоды дзейнасці пратэстанцкіх і каталіцкіх цэркваў, таму што яны маюць незалежнае стаўленне да падзей, якія адбываюцца ў краіне", — адзначыў на пікетаванні пастар Я.Лукасік.

Актывісты падрыхтавалі пісьмовы зварот да беларускіх улад, у якім яны патрабавалі спынення ціску на хрысціянскія цэрквы і незалежную прэсу, спынення палітычных рэпрэсій і ўжывання карных мер да апазіцыйных дзеячаў, амністыі палітвязняў. У звароце адзначана, што "заваяваўшы свабоду, сёння Беларусь не з'яўляецца краінай, дзе вольна сябе адчуваюць яе грамадзяне". "Грамадзянскія свабоды — сумлення, слова і іншыя — зафіксаваныя толькі на паперы. На справе жа адбываецца іх грубае парушэнне. Галоўны парушальнік — улады Рэспублікі Беларусь на чале з яе прэзідэнтам Аляксандрам Лукашэнкай", — вядзецца ў звароце.

Далей заяўнікі зважаюць, што "парушэнне волі сумлення выяўляецца ў ціску на асобныя цэрквы, рэйдэрскіх захопах царкоўнай маёмасці, дэпартацыі святароў". Нагадваюць украінцы і пра арышты грамадскіх актывістаў і палітычных дзеячоў, гвалтоўныя заклікі ў войска і адлічэнні з вну.

"Сёння, мы — вольныя людзі Ўкраіны, патрабуем ад улад Беларусі спынення ціску на хрысціянскія цэрквы, не падкантрольныя дзяржаве, прыпынення палітычных рэпрэсій і карных мер у адносінах апазіцыйных дзеячоў і рухаў, амністыі палітвязняў, змешчаных у турмах і СІЗА. У выпадку ігнаравання нашых патрабаванняў мы будзем вымушаныя працягнуць пратэстныя акцыі з прыцягненнем увагі ўкраінскага грамадства, СМІ, палітычных сіл да праблем у Беларусі. Нам прыйдзецца звярнуцца ў еўрапейскія інстытуты з заклікам недапушчэння ўдзелу аўтарытарнай Беларусі ў праграме "Ўсходняе партнёрства" і іншых інтэграцыйных еўрапейскіх праектах", — падагульняюць аўтары заявы.