Царкве «Новае жыцьцё» адмоўлена ў праве на памяшканьне

Сёньня касацыйная калегія Вышэйшага гаспадарчага суда не задаволіла скаргу царквы «Новае жыцьцё» на рашэньне ВГС ад 13 студзеня 2009 году.

Тады, 13 студзеня, Вышэйшы гаспадарчы суд адмовіў царкве «Новае жыцьцё» ў ейным патрабаваньні прызнаць незаконным рашэньне Менгарвыканкаму аб пазбаўленьні права карыстацца зямлёй і будынкам, нагадвае «Радыё Свабода».

«Мы ня згодныя з гэтым рашэньнем. Мы ў сваёй скарзе прасілі ануляваць рашэньне суду ад 13 студзеня і вынесьці новае рашэньне, у якім прызнаць рашэньне Менгарвыканкаму ад 2005 году незаконным», – адзначыў юрыст царквы Сяргей Луканін.

Касацыйная калегія суду пакінула бязь зьменаў рашэньне ад 13 студзеня 2009 году, а таксама пакінула без задавальненьня касацыйную скаргу рэлігійнай грамады.

Прадстаўнікі царквы заявілі, што будуць далей абскарджваць гэтае рашэньне.

Нагадаем, што з 18 кастрычніка 2006 года Вышэйшы гаспадарчы суд (ВГС) разглядае пазовы царквы «Новае жыцьцё»: аб прызнанні пазапраўным рашэння Менгарвыканкама аб пазбаўленні суполкі зямлі і будынка па вул. Кавалёва; аб перапрафіляванні будынка кароўніка ў культавы і змяненні мэтавага прызначэння зямельнага ўчастку; аб спагнанні з Менгарвыканкама шкоды, панесенай царквой у памеры ўсіх сум дзяржпошлін, якія былі выплачаныя істцом у сувязі з абскарджаннем рашэння ўладаў (1 млн. 829 тыс. рублёў).

Восеньню 2006-га году шматлікія вернікі на знак салідарнасьці з царквой «Новае жыцьцё» абвясьцілі галадоўку і трымалі яе да тае пары, пакуль улады не прапанавалі вырашыць канфлікт у Вышэйшым гаспадарчым судзе.

Апошняе судовае пасяджэнне ВГС адбылося 22 сакавіка 2007 году.