У Малдове акцыі пратэсту перад тэлецэнтрам пройдуць у рэжыме нон-стоп
2- 10.04.2009, 10:15
Мэр Кішынёва, які з'яўляецца віцэ-старшынём апазіцыйнай Ліберальнай партыі, Дорын Кіртоакэ дазволіў правядзенне двух акцый пратэсту ў пятніцу, 10 красавіка, - у цэнтры малдаўскай сталіцы, а таксама перад будынкам тэлецэнтра.
На прэс-канферэнцыі ў чацвер увечары ён сказаў, што рух «Еўрапейскае дзеянне» звярнуўся за дазволам пачаць пратэст перад будынкам кампаніі «Тэле-радыё Малдовы» з 10 па 29 красавіка.
Па словах мэра, акцыя будзе праводзіцца ў рэжыме нон-стоп, падчас якой яе ўдзельнікі будуць дамагацца ад тэлерадыёкампаніі праўдзівага асвятлення падзей у краіне, а таксама патрабаванняў пратэстуючых - прызнаць вынікі парламенцкіх выбараў 5 красавіка несапраўднымі.
Па ягоных словах, акцыі пратэсту ў цэнтры Кішынёва павінняы праводзіцца толькі да 21.00 мясцовага часу.
Акцыі пратэсту апазіцыі пачаліся пасля парламенцкіх выбараў, якія адбыліся 5 красавіка, перамогу на якіх, па афіцыйных дадзеных малдаўскіх улад, атрымала кампартыя. Апазіцыянеры не згодныя з вынікамі выбараў і вінавацяць улады ў фальсіфікацыі.
