Рада Еўразвяза: «Пытанне аб запрашэнні Лукашэнкі ў Прагу не вырашанае»

Саміт удзельнікаў праекту Еўразвяза «Ўсходняе партнёрства» адбудзецца 7 мая ў Празе, аднак пытанне з запрашэннем на саміт ЕЗ беларускага дыктатара пакуль не вырашанае.

Аб гэтым сказаў у аўторак РІА «Новости» прадстаўнік Рады Еўразвяза. Пры гэтым еўрапейскі чыноўнік паведаміў, што міністры юстыцыі і ўнутраных спраў 27 краін-удзельніц ЕЗ прынялі напярэдадні на паседжанні ў Люксембурзе рашэнне аб запуску Еўразвязам з Беларуссю дыялогу па правах чалавека.

Праграма «Ўсходняе партнёрства», падключэнне да якой Беларусі лідэры ЕЗ ухвалілі на саміце ў сакавіку ў Брусэлі, прадугледжвае вылучэнне гэтым шасці краінам да 2013 года 600 мільёнаў еўра. Яны прызначаныя, у прыватнасці, на ўмацаванне дзяржаўных інстытутаў, кантролю меж і аказанне дапамогі малым кампаніям.

Кіраўнікі МЗС дзяржаў ЕЗ пацвердзілі ў сакавіку рашэнне аб нескарыстанні на бліжэйшыя дзевяць месяцаў візавых абмежаванняў у адносінах прадстаўнікоў кіраўніцтва Беларусі, уключаючы Аляксандра Лукашэнку, якім быў забаронены ўезд у Еўропу.

У кастрычніку 2008 года Рада міністраў ЕЗ вырашыла прыпыніць дзеянне забароны на выдачу віз беларускім службовым асобам, якая была ўведзеная ў 2006 годзе ў адказ на дзеянні Беларусі ў адносінах апазіцыі. Санкцыі распаўсюджваліся на Лукашэнку і 41 беларускага чыноўніка.

Па-ранейшаму дзейнічаюць санкцыі супраць чыноўнікаў, якія падазраюцца міжнароднай супольнасцю ў забойствах лідэраў апазіцыі і журналіста – экс-кіраўнікі МУС Уладзіміра Навумава, былога сакратара Савета бяспекі Віктара Шэймана, камандзіра спецназа ўнутраных войск Дзмітрыя Паўлічэнкі і экс-міністра ўнутраных спраў Юрыя Сівакова. У ліку невыязных і кіраўнік Цэнтравыбаркама Беларусі Лідзія Ярмошына - за фальсіфікацыю вынікаў выбараў у Беларусі.