Мінэнерга Беларусі не прызнае наяўнасць запазычанасці перад «Газпрамам»

Намеснік міністра энергетыкі заяўляе, што Беларусь разлічваецца з «Газпрамам» па раней прадугледжаных дамоўленасцях.

Беларусь разлічваецца за газ у поўным аб'ёме. Аб гэтым заявіў карэспандэнту БелТА першы намеснік міністра энергетыкі Беларусі Эдуард Таўпянец, каментуючы інфармацыю, якая з'явілася ў СМІ, аб патрабаваннях, што высоўваюцца ААТ «Газпрам», да ААТ «Белтрансгаз» загасіць запазычанасць у суме больш за $230 млн. за пастаўлены ў студзені-красавіку прыродны газ.

«Плацяжы вядуцца ў поўным аб'ёме зыходзячы з сярэднегадовага кошту на газ, як гэта прадугледжана дамоўленасцямі на вышэйшым узроўні», - сказаў Эдуард Таўпянец.

На пытанне, ці сапраўды «Газпрам» мае намер высунуць пазоў аб пагашэнні запазычанасці, першы намміністра адказаў, што па гэтай падставе варта звяртацца ў ААТ «Белтрансгаз».

«У Міністэрства энергетыкі ніякіх папер не паступала», - дадаў ён.

Генеральны дырэктар «Белтрансгаза» Уладзімір Маёраў пакуль устрымаўся ад каментароў па гэтай тэме.

«Будзе падрыхтаванае паведамленне для прэсы», - сказаў ён.

Сёння жа агенцтва БелаПАН са спасылкай на дадзеныя Нацыянальнага статыстычнага камітэта паведаміла, што сярэдні кошт расейскага прыроднага газу ў студзені-красавіку 2009 года склала для Беларусі 198 даляраў за тысячу кубаметраў.

У параўнанні са студзенем-сакавіком гэты паказчык знізіўся на 15 даляраў.

Нагадаем, у пачатку лютага 2009 года «Газпрам» і «Белтрансгаз» падпісалі дадатковае пагадненне да кантракту на пастаўку газу ў Беларусь у 2007—2011 гадах. Яно прадугледжвае паэтапнае паніжэнне кошту на газ у 2009 годзе з улікам сусветнага падзення коштаў на нафту.

Паміж тым, паміж Менскам і Масквой перыядычна ўзнікаюць рознагалоссі з нагоды кошту на газ.

17 чэрвеня стала вядома, «Газпрам» накіраваў у «Белтрансгаз» ліст з патрабаваннем загасіць запазычанасць за газ, пастаўлены ў Беларусі ў студзені—красавіку 2009 года. Сума запазычанасці — 231,18 млн. даляраў без уліку пяні і штрафу за нявыбраны газ.