Свабоду Аўтуховічу, Лявонаву, Асіпенку! (Фота)
- 24.06.2009, 14:59
Пад такім лозунгам прайшла чарговая акцыя дэмакратычных актывістаў у Бабруйску.
Актывісты грамадзянскай кампаніі «Еўрапейская Беларусь» вывесілі на масту, насупраць бабруйскага аўтавакзала, 8-метровую расцяжку са словамі «Свабоду Аўтуховічу, Лявонаву, Асіпенку!», паведамляе сайт f-fight.org.
Нагадаем што лідэры прадпрымальнікаў з Ваўкавыска Мікалай Аўтуховіч, Юрый Лявонаў і Ўладзімір Асіпенка былі затрыманыя 8 лютага 2009 года. Праваабаронцы лічаць затрыманых палітвязнямі, зважаючы на тое, што Аўтуховіч і Лявонаў раней былі судзімыя і прызнаныя міжнароднай супольнасцю вязнямі сумлення. Мікалай Аўтуховіч трымае бестэрміновую галадоўку пратэсту з 16 красавіка.
Актывісты «Еўрапейскай Беларусі» маюць намер і далей працягваць акцыі салідарнасці з палітвязнямі – да іх вызвалення.
