Лукашэнка пра падрыхтоўку пастановы № 991: Спытаць нават няма з каго!

Беларускі кіраўнік заявіў, што дакумент падрыхтаваў буйны «дзеяч» па ўказцы прэм'ера.

Заява Аляксандра Лукашэнкі прагучала 6 жніўня на нарадзе па пытаннях дзейнасці органаў пракуратуры.

«Вось, да прыкладу, нядаўна выпусцілі пастанову № 991 <…> і фактычна забаранілі суб'ектам гаспадарання гандляваць. Ды хай кіраўнік сам вырашае, як дзейнічаць, а пытацца трэба за прыбытак і рэнтабельнасць! — заявіў Лукашэнка. — Навошта камусьці указваць: з кім гандляваць, працаваць з пасярэднікамі ці не? Сталі разбірацца, хто пастанова рыхтаваў. Высветлілася, адзін «дзеяч» па ўказанні прэм'ер-міністра падрыхтаваў гэты дакумент, кінуў яму на стол і назаўтра з'ехаў у адпачынак. Спытаць нават няма з каго!»

«Так, пасрэдніцтва — гэта дрэнна, і мы павінны яго пазбягаць, — працягнуў Лукашэнка. — Але з якой мэтай? Каб кошт быў ніжэй, а якасць — лепш. Навошта ўздыбілі ўсю краіну? Гэта справа прыватніка, дзе і як закупляць, ён жа разумее, што гэта яго грошы, ён ніколі не набудзе даражэй і з горшай якасцю. Значыць, пытанні да дзяржаўных прадпрыемстваў. Так давайце паставім задачы, а потым праз месяц праверым, вінаватыя адкажуць. Вось і ўсё, і не трэба ніякага шуму. Інакш узнікаюць пытанні: дзе ж тая лібералізацыя эканамічнай дзейнасці, пра якую мы кажам, дзе самастойнасць кіраўніка, калі мы яму пішам, што ў каго набыць. Хай ён сам разбіраецца, а нашая задача — даць прававую і іншую ацэнку кіраўніку, які адказвае за вытворчасць. Вось як трэба дзейнічаць, а не фронтам хадзіць па краіне».

Пастанова № 991 была прынятая 28 ліпеня і адмененая 4 жніўня пасля ўмяшання Лукашэнкі. Дакумент, які міністр эканомікі Мікалай Зайчанка назваў «антыкрызіснай мерай», выклікаў рэзка негатыўную рэакцыю бізнэс-супольнасці.