Малдова пачынае перамовы з Еўразвязам аб асацыяваным сяброўстве
10- 5.01.2010, 13:34
Малдова і Еўрапейскі Звяз 12 студзеня ў Кішынёве пачнуць афіцыйныя перамовы аб падпісанні пагаднення аб асацыяваным сяброўстве.
Пра гэта заявіў у Кішынёве прэм’ер-міністр Малдовы Уладзімір Філат, даючы справаздачу пра першыя 100 дзён дзейнасці ўрада па выкананні сваёй праграмы «Еўрапейская інтэграцыя: свабода, дэмакратыя, дабрабыт».
Ён адзначыў, што рашэнне пра пачатак перамоваў было прынята раней у Брусэлі на апошнім паседжанні Рады па супрацоўніцтве Малдова-ЕЗ.
У лютым чакаецца таксама візіт у Кішынёў місіі ЕЗ, у рамках якога пачнуцца перамовы аб лібералізацыі візавага рэжыму з Еўразвязам. Філат адзначыў, што раней Сербія дамаглася ад ЕЗ бязвізавага рэжыму для сваіх грамадзян за 1 год 7 месяцаў, а ўлады Малдовы спадзяюцца вырашыць гэтую праблему і атрымаць бязвізавы рэжым для грамадзян рэспублікі ў беспрэцэдэнтна сціслыя тэрміны.
Кіраўнік кабінета міністраў таксама падкрэсліў, што новы ўрад Малдовы мае істотную падтрымку Еўрапейскага звяза на самым высокім узроўні.
