Раманчук: Польшча гатовая дапамагчы новаму дэмакратычнаму ўраду Беларусі
13- 14.10.2010, 11:09
Падчас двухдзённага візіту ў Варшаву намеснік старшыні Аб'яднанай грамадзянскай партыі сустрэўся з кіраўніцтвам Польшчы.
Яраслаў Раманчук сустрэўся з міністрам замежных справаў Польшчы Радаславам Сікорскім, старшынём сената Багданам Барусевічам і кіраўніком парламенцкага камітэта па міжнародных справах Анджэем Халіцкім, перадае ucpb.org.
«Наладжаныя вельмі добрыя партнёрскія сувязі з вышэйшым кіраўніцтвам Польшчы, кіраўнікамі абедзвюх палатаў парламента, з кіраўнікамі МЗС, з людзьмі, якія выпрацоўваюць і прымаюць рашэнні, - адзначыў Раманчук, паляк па паходжанні, які выдатна валодае польскай мовай. - Ёсць агульнае разуменне ацэнкі сітуацыі ў Беларусі і таго, што вынікі выбараў могуць быць прызнаныя толькі тады, калі на кожным этапе гэтыя выбары будуць адпавядаць пэўным еўрапейскім стандартам якасці - як у дачыненні да збору подпісаў, так і ў дачыненні да свабоды доступу да СМІ, прадстаўніцтва апазіцыі у выбарчых камісіях, рэальнага, а не фіктыўнага падліку галасоў.
Што датычыць перспектываў эканамічнага супрацоўніцтва, дык Яраслаў Раманчук падкрэсліў зацікаўленасць дзелавых колаў Польшчы ў такім супрацоўніцтве:
«Польскі бізнэс у значнай меры зацікаўлены ў Беларусі. Яны ўважліва выслухалі мой аналіз бягучай сітуацыі інвестыцыйнай прывабнасці. Акрамя таго, я знайшоў вельмі добрых партнёраў у асобе сур'ёзных аналітычных структураў, інвестыцыйных структураў, якія гатовыя дапамагчы нашаму ўраду - новаму дэмакратычнаму ўраду - у рэструктурызацыі і мадэрнізацыі прадпрыемстваў і правядзенні такіх рэформаў, якія далі б станоўчы вынік ужо на працягу 12-18 месяцаў».
