«Контраргумент» уладаў: Прарэктары збіраюць подпісы ў адпачынку

Цікавыя заўвагі намесніка старшыні Гомельскай абласной выбарчай камісіі надрукавала газета «Савецкі раён».

У каментары аб ходзе выбарчай кампаніі ў рэгіёне Аляксандр Вусаў, у прыватнасці, узгадаў пра тое, што абласной камісіяй разглядалася скарга з нагоды нібыта незаконнага збору подпісаў у студэнтаў Беларускага дзяржаўнага ўніверсітэта транспарту і аказання на іх ціску з боку прарэктара ўніверсітэта - кіраўніка ініцыятыўнай групы па Чыгуначным раёне Гомеля Галіны Чаянковой, паведамляюць «Праваабаронцы за свабодныя выбары».

«Праверка паказала, што прарэктар сапраўды збірала подпісы, але рабіла гэта, знаходзячыся ў адпачынку, так што прымушаць студэнтаў распісвацца ў падпісных лістах яна не магла», - пракаментаваў гэты факт намеснік старшыні камісіі.

Уявіце сабе карціну - прарэктар просіць студэнтаў падпісацца за Лукашэнку, а яны ёй адмаўляюць, матывуючы гэта тым, што, маўляў, вы, паважаная прарэктар, цяпер у адпачынку, таму мы вас слухаць не будзем!

Аляксандр Вусаў узгадаў яшчэ адну скаргу, пра якую пісалі «Праваабаронцы за свабодныя выбары» - калі сяброў ініцыятыўнай групы Віталя Рымашэўскага не пусцілі ў інтэрнат медыцынскага ўніверсітэта. «Перастрахоўшчыкаў, на жаль, яшчэ хапае, - уздыхнуў Вусаў. - Пасля «лікбезу» адміністрацыя інтэрната змяніла сваё рашэнне і дазволіла арганізаваць у фае пікет», - піша выданне.

На самой справе ніхто і не прапаноўваў сябрам ініцыятыўнай групы правесці ў фае пікет, так яны і сышлі ні з чым з інтэрната, не дапамагла і міліцыя, якую выклікалі.

Калі верыць Вусаву, то подпісы збіраць у інтэрнаце можна, а тыя, хто перашкаджае гэтаму - «перастрахоўшчыкі». Аказваецца, шмат такіх у Гомелі.