У Магілёве апазіцыю не пускаюць у выбаркамы

Прычына адмовы цынічная - адсутнасць вопыту працы ва ўчастковых камісіях.

Прадстаўнікі апазіцыі не ўвайшлі ў склад участковых камісіяў па выбарах прэзідэнта.

Пра гэта паведаміў БелаПАН кіраўнік абласной кааліцыі дэмакратычных сілаў Юры Новікаў.

Паводле яго словаў, пасяджэнні адміністрацыяў Ленінскага і Кастрычніцкага раёнаў горада па фарміраванні ўчастковых выбарчых камісіяў прайшлі 1 і 2 лістапада. Ніводзін з вылучаных прадстаўнікоў зарэгістраваных апазіцыйных структураў, якія ўваходзяць у кааліцыю, не ўключаны ў склад камісіяў.

Паводле словаў назіральніка ад грамадскага аб'яднання «БНФ «Адраджэньне» Барыса Бухеля, ў асноўным прычынай адмовы служыла адсутнасць вопыту працы ва ўчастковых камісіях у прадстаўнікоў апазіцыі. «Але дзе ж яму быць, калі апазіцыянераў ніколі не ўключаюць у гэтыя камісіі?», - пракаментаваў Бухель.

Усяго ад абласной кааліцыі дэмакратычных сілаў было вылучана 79 прадстаўнікоў ва ўчастковыя выбарчыя камісіі Ленінскага раёна Магілёва і 31 чалавек - Кастрычніцкага.

Прадстаўнікі апазіцыі маюць намер абскардзіць рашэнні адміністрацыяў двух раёнаў абласнога цэнтра ў судовым парадку.