Супраць збітага міліцыяй Лябедзькі могуць узбудзіць крымінальную справу (Фота)

Лідэр АГП быў затрыманы падчас суду над кіраўнічкай івянецкага аддзялення Звяза палякаў Тэрэзай Собаль.

15 лютага старшыня Аб'яднанай грамадзянскай партыі Анатоль Лябедзька быў вызвалены з Валожынскага РУУС толькі ў 19.00, правёўшы там больш за 9 гадзінаў. Палітык паведаміў падрабязнасці свайго затрымання сайту ucpb.org.

«Супрацоўнікі міліцыі адмаўляліся пускаць людзей у будынак суда, заявіўшы, што тут праходзіць спецаперацыя. Калі я пачаў фатаграфаваць беззаконне, якое адбывалася, на камеру мабільнага тэлефона, мяне адразу схапілі, заламалі рукі, пачалі біць па нагах і даставілі ў будынак РУУС.

Падпалкоўнік Петаш узяў у мяне тлумачэнні па факце таго, што адбылося, затым, у 17 00 прыйшоў намеснік пракурора Юрэвіч і мяне даставілі да суддзі Зенькі. Высветлілася, што мяне абвінавачваюць па артыкуле 23 Кодэкса аб адміністрацыйных правапарушэннях і лічаць арганізатарам несанкцыянаванага мітынгу. Пасля суддзя Зенька ўдакладніў, што зараз справа разглядацца не будзе, а ўсе матэрыялы будуць накіраваныя ў пракуратуру дзеля ўзбуджэння крымінальнай справы», -- распавёў Анатоль Лябедзька.

Лябедзька лічыць, што канфлікт вакол Дома польскага ў Івянцы выкліканы тым, што беларускія ўлады жадаюць кантраляваць усё, у тым ліку грамадзянскую супольнасць.

«Чаму ўсё адбываецца ў такой жорсткай форме? Я думаю, віна за гэта ляжыць на частцы палітычнай апазіцыі і на міжнароднай супольнасці, якія сталі тварам паварочвацца да «чырвонага» дома і задам да грамадзянскай супольнасці. Лукашэнка нічога не зрабіў, а з ім сустракаецца Папа Рымскі, прыязджае Берлусконі, беларускіх дыпламатаў прымаюць у Варшаве. А частка апазіцыі замест таго, каб выступаць за крытычны дыялог уладаў з Брусэлем, аддала перавагу ўбудавацца ў новую палітыку, падтакваючы, што ў нас усё нармальна», – сказаў палітык.

Як раней паведамляў сайт charter97.org, 15 лютага, напярэдадні суду над кіраўнічкай непрызнанага ўладамі Звяза палякаў у Івянцы Тэрэзай Собаль, беларускімі ўладамі было затрымана кіраўніцтва ЗПБ на чале з Анжалікай Борыс.

Борыс аштрафаваная на 30 базавых велічыняў (1 млн. 50 тыс. рублёў), прадстаўнікі кіраўніцтва Анджэй Пачобут, Ігар Банцар і Мячыслаў Яскевіч асуджаныя на пяць сутак арышту за арганізацыю 10 лютага ў Гародні мітынгу ў падтрымку Івянецкай арганізацыі ЗПБ.

Усяго 15 лютага ў розных месцах Беларусі былі затрыманыя каля 40 актывістаў ЗПБ, якія накіроўваліся ў суд Валожынскага раёна, каб падтрымаць Собаль.

Тэрэза Собаль абвінавачваецца ў захопе мясцовага Дома палякаў. Пазоў у дачыненні да Собаль падаў старшыня праўладнага СПБ Станіслаў Сямашка.

Нагадаем, што 8 лютага Польскі дом быў захоплены супрацоўнікамі міліцыі. Усіх актывістаў ЗПБ на чале з Тэрэзай Собаль адтуль выгналі з ужываннем сілы, а ўвялі туды пад аховай міліцыі кіраўніка праўладнага Саюза палякаў у Івянцы Станіслава Бурачэўскага.

Звяз палякаў быў расколаты ў 2005 годзе. Частка яго, лаяльная ўладам, з'яўляецца афіцыйна прызнанай. Актывісты непрызнанага ЗПБ на чале з Анжалікай Борыс церпяць пераслед з боку ўладаў.

15 лютага каля суду была таксама затрыманая рэдактар польскамоўнай газеты «Glos znad Niemna na uchodzstwie» Ірэна Валюсь