Лукашэнка адмовіўся ад візіту ў Літву
31- 10.03.2010, 11:14
Беларускі кіраўнік адмовіўся ехаць у Вільню на юбілейныя ўрачыстасці з нагоды 20-годдзя аднаўлення незалежнасці Літвы.
Афіцыйную дэлегацыю Беларусі на юбілейных урачыстасцях з нагоды 20-годдзя аднаўлення незалежнасці Літвы ўзначаліць не Аляксандр Лукашэнка, а намеснік прэм'ер-міністра ўрада Беларусі Віктар Бура.
Аляксандр Лукашэнка паінфармаваў пра сваё рашэнне прэзідэнта Літоўскай Рэспублікі Далю Грыбаўскайтэ.
Як перадае афіцыйнае агенцтва БелТА, Лукашэнка падзякаваў за запрашэнне на святкаванне і пацвердзіў запрашэнне кіраўніка літоўскай дзяржавы наведаць з візітам Беларусь.
Як ужо паведамляў сайт charter97.org, Сейм Літвы запрасіў на святкаванне 20-годдзя незалежнасці Літвы першага кіраўніка незалежнай Беларусі, былога старшыню Вярхоўнага Савета Станіслава Шушкевіча.
Нагадаем, што 11 сакавіка 2010 года Літва адзначыць 20-годдзе з дня прыняцця акту «Аб аднаўленні Незалежнай Літоўскай дзяржавы». 13 ліпеня 2010 года Літва будзе святкаваць 750-годдзе бітвы пры Дурбэ, а 15 ліпеня – 600-годдзе Грунвальдскай бітвы.
Нагадаем, што папярэдні візіт Лукашэнкі ў Вільню адбыўся ў верасні 2009 года. Міжнародныя і беларускія праваабарончыя арганізацыі раскрытыкавалі тады сустрэчу прэзідэнта Літвы з апошнім дыктатарам Еўропы – апазіцыя ў Беларусі церпіць жорсткія рэпрэсіі, у турмах знаходзяцца палітвязні, уціскаецца свабода слова і фальсіфікуюцца вынікі выбараў.
