Багданкевіч: Банкаўская сістэма можа абрынуцца ў любы момант
33- 12.03.2010, 10:13
Былы галоўны банкір Беларусі раскрытыкаваў крэдытную палітыку, якую праводзіць Нацбанк.
Станіслаў Багданкевіч упэўнены, што банкаўская сістэма Беларусі можа абрынуцца ў любы момант.
Такі песімістычны прагноз былы кіраўнік Нацыянальнага банка зрабіў падчас паседжання «круглага стала» па пытаннях пераадолення эканамічнага крызісу, які прайшоў 11 сакавіка ў Менску, паведамляе «Радыё Рацыя».
Багданкевіч жорстка раскрытыкаваў крэдытную палітыку, якую зараз праводзіць Нацыянальны банк.
«Даўгі выраслі на 42%. Што гэта за крэдытная палітыка? Куды ідуць крэдыты? Яны ідуць на падтрыманне неэфектыўнай вытворчасці. Сацыяльны крэдыт. Каб толькі працаўнік прыходзіў на працу – атрымліваў 500 тысячаў і сядзеў там. Ці нават і мільён. Ці патрэбныя такія крэдыты? Ці правільная гэта палітыка Нацыянальнага банка?», -- задаў рытарычнае пытанне Станіслаў Багданкевіч.
Як падкрэсліў эксперт, зараз у Беларусі ствараецца своеасаблівая «фінансавая піраміда», калі грошы пазычаюцца прадпрыемствам для таго, каб выплаціць зарплаты, а не для таго, каб рэалізоўваць якія-небудзь інвестыцыйныя праекты.
Па словах Станіслава Багданкевіча, гэта стварае небяспеку, што ў выніку банкаўская сістэма можа быць пахаваная з-за таго, што гэтыя крэдыты ніколі ёй не вернуцца.
