Дырэктар «Савушкіна прадукта» уключыў адміністрацыйны рэсурс

У Берасці па Партызанскай выбарчай акрузе № 8 апанентам сябра Партыі БНФ выступае генеральны дырэктар ААТ «Савушкін прадукт» Аляксандр Саўчыц.

Падчас агітацыйнай кампаніі кандыдаты маюць права сустракацца з выбаршчыкамі ў месцах, вызначаных для гэтага акруговай выбарчай камісіяй. Сярод такіх месцаў, як паведаміла газета «Зара» (13.03.2010), названы і інтэрнат ААТ «Савушкін прадукт», а таксама інтэрнат камбіната будаўнічых матэрыялаў, сярэдняя школа № 31 і сярэдняя школа № 10 горада Берасця, паведамляюць «Праваабаронцы за свабодныя выбары».

Актывіст Партыі БНФ Уладзімір Вялічкін звярнуўся да дырэктара інтэрната ААТ «Савушкін прадукт» Яўгена Мушынскага з просьбай аб прадастаўленні памяшкання ў інтэрнаце для сустрэчы з выбаршчыкамі, але атрымаў адмоўны адказ. Дырэктар інтэрната сказаў: «У мяне свабодных памяшканняў няма».

Кандыдат ад Партыі БНФ плануе накіраваць афіцыйны ліст аб прадастаўленні яму памяшкання для сустрэчы з выбаршчыкамі ў інтэрнаце.