Барадзін паслаў беларускага амбасадара «у адно месца» (Відэа)

Заява дзяржсакратара Паўла Барадзіна прагучала як раз напярэдадні так званага свята «яднання» РФ і Беларусі.

Дзяржсакратар «саюзнай дзяржавы» даў святочную прэс-канферэнцыю, на якой абвесціў, што ўвесь гэты час Масква і Менск, аказваецца, «будуюць цудоўна развіты камунізм».

На пытанне афіцыйнага беларускага інфармагенцтва БелТА пра тое, як дзяржсакратар ставіцца да думкі амбасадара Беларусі ў Расеі Даўгалёва, які лічыць, што зараз больш намаганняў трэба прыкладаць не на будаўніцтва «саюзнай дзяржавы», а на стварэнне Мытнага саюза Расіі, Беларусі, Казахстана і Украіны. Павал Барадзін адказаў: «І Казахстан, і Украіна, у бліжэйшы час і ўсе астатнія нашыя рэспублікі павінны ўвайсці ў нашую саюзную дзяржаву. Гаворка ідзе пра ўваходжанне накшталт Еўразвяза - ўладкаванне нашай ўсёй постсавецкай прасторы. Ну а такіх амбасадараў трэба пасылаць у адно месца - якое вы ведаеце ... »

Пра інцыдэнт паведаміла газета «Московский комсомолец», апублікаваўшы на сайце відэазапіс фрагмента прэс-канферэнцыі.

Пасля такога выпаду прэс-канферэнцыя сама сабой сышла на нішто. А дух «яднання народаў» кудысьці знік. Праўда журналістаў, якія прыйшлі на мерапрыемства, настойліва папрасілі не друкаваць і не паказваць на відэа рэзкае выказванне Барадзіна. Маўляў, Пал Палыч пагарачыўся. Аднак «МК» вырашыў распавесці грамадскасці, якая на самой справе цана хвалёнаму яднанню, калі сам дзяржсакратар «саюзнай дзяржавы» дазваляе сабе адкрыта пасылаць дыппрадстаўніка Беларусі.