У сваім апошнім слове Аўтуховіч не прызнаў сябе вінаватым

Па словах палітвязня, яму памсцяць высокапастаўленыя чыноўнікі, якія пераследуюць яго з 2003 года.

Вярхоўны суд, дзе працягваецца разгляд крымінальнай справы ваўкавыскіх прадпрымальнікаў, пачаў заслухоўваць апошнія словы абвінавачаных. Першым выступіў Мікалай Аўтуховіч.

Як паведаміў БелаПАН праваабаронца Вячаслаў Сіўчык, Аўтуховіч не прызнаў сваёй віны.

«Ён вельмі падрабязна спыніўся на фактах карупцыі ў Гарадзенскай вобласці. Ён выступаў дзве гадзіны, і, такое ўражанне, што выклаў усё, што вядома, - нягледзячы на тое, што суддзя некалькі разоў спрабаваў яго спыніць. Як заявіў Аўтуховіч, гэты працэс - працяг яго пераследу, якое пачалося яшчэ ў 2003 годзе, і ў яго пераследзе зацікаўленыя вельмі высокія чыноўнікі», - адзначыў Сіўчык.

«Мяне пераследуюць, таму што я не змірыўся і працягваў барацьбу за сваю рэабілітацыю і пакаранне чыноўнікаў», - сказаў Аўтуховіч.

Як перадае «Радыё Свабода», Мікалай Аўтуховіч прааналізаваў доказы, сабраныя следствам. Ён абверг паказанні Аляксандра Ларына больш чым у 20 выпадках і паўтарыў сваё меркаванне, што гэты чалавек яго агаворвае. Па словах Аўтуховіча, Ларын паклёпнічае па загадзе следства і ў пэўных асабістых мэтах.

З апошнім словам сёння выступіў таксама Міхаіл Казлоў.

«Яго выступленне было больш юрыдычна аформлена. Ён канкрэтна назваў артыкулы Крымінальнага кодэксу, якія парушыла следства пры расследванні справы. Пры гэтым Казлоў высока ацаніў дзеянні пракурора Эльдара Сафарава. Ён працытаваў следчага Клачко, які казаў яму, што, калі ён спыніць крымінальную справу ў дачыненні да Аўтуховіча і Асіпенкі, то яго «не зразумеюць», - распавёў праваабаронца.

У другой палове дня працягнецца заслухоўванне апошніх слоў абвінавачаных.

Нагадаем, абвінавачанымі па дадзенай крымінальнай справе праходзяць прадпрымальнікі з Ваўкавыска Мікалай Аўтуховіч і Уладзімір Асіпенка, а таксама Аляксандр Ларын і Міхаіл Казлоў. Першых трох абвінавачваюць у падрыхтоўцы тэрарыстычнага акту ў адносінах намесніка міністра па падатках і зборах Васіля Камянко і былога старшыні Гарадзенскага аблвыканкама Уладзіміра Саўчанкі. Аўтуховіча і Асіпенку таксама абвінавачваюць у арганізацыі падпалу дома былога начальніка Ваўкавыскага РАУС Сяргея Кацубы ў 2004 годзе.

Падпалкоўнік міліцыі Казлоў, былы кіраўнік упраўлення па барацьбе з арганізаванай злачыннасцю па Гарадзенскай вобласці, абвінавачваецца ў тым, што ведаў аб планах падрыхтоўкі тэрарыстычнага акту, але не распачаў мер па яго прадухіленні.

16 красавіка пракурор Эльдар Сафарам запатрабаваў прысудзіць Аўтуховіча да 20 гадоў калоніі ўзмоцненага рэжыму з канфіскацыяй маёмасці, Асіпенку і Ларына - да 11 гадоў пазбаўлення волі ў калоніі ўзмоцненага рэжыму. Для Міхаіла Казлова ён запрасіў тры гады калоніі агульнага рэжыму без права займаць кіруючыя пасады.

Праваабаронцы лічаць гэтую крымінальную справу палітычна матываванай.