РФ вызваляе газ для Ўкраіны ад пошліны, а Чарнаморскі флот застаецца ў Крыме яшчэ на 25 гадоў
38- 21.04.2010, 16:50
ААТ «Газпром» і НАК «Нафтагаз Украіны» ў сераду ў Харкаве падчас працоўнага візіту прэзідэнта РФ ва Ўкраіну падпісалі дапаўненні да кантракту на пастаўку прыроднага газу.
«Плацяжы за газ НАК «Нафтагаз Украіны» будзе ажыццяўляць са зніжкай на велічыню зніжэння экспартнай пошліны пры пастаўках газу ва Ўкраіну, якая ўсталёўваецца ўрадам РФ», - гаворыцца ў паведамленні «Газпрома», якое цытуе «Інтэрфакс».
Як чакаецца, зніжэнне складзе $ 100 за 1000 куб. м газу, але не больш за 30% ад цаны газу, і будзе распаўсюджвацца на аб'ёмы паставак 30 млрд куб. м у 2010 годзе, і 40 млрд куб. м - у наступныя гады.
«Змены ў кантракт ўнесеныя ў адпаведнасці з міжурадавымі дамоўленасцямі і не пагаршаюць эканоміку «Газпрома», - прыводзіцца ў паведамленні каментар кіраўніка «Газпрома» Аляксея Мілера.
Гадавы кантрактны аб'ём газу ў 2010 годзе павялічаны да 36,5 млрд. куб. м.
Формула цаны і ўмова «бяры або плаці» застаюцца без змяненняў.
Аднак «падпісаным дадаткам таксама адмененыя пункты кантракту, якія адносяцца да ўзаемных штрафных санкцый, якія па практыцы яго выканання не ўжываліся», - паведамляе кампанія.
Таксама дасягнутае пагадненне аб тым, што 80% кошту транзіту газу «Газпром» будзе аплочваць да 6 дня наступнага месяца, 20% - у адпаведнасці з дзеючым кантрактам на транзіт - да 20 дня наступнага месяца.
Тэрмін знаходжання Чарнаморскага флоту РФ у Крыме падаўжаецца на 25 гадоў, паведаміў прэзідэнт РФ Дзмітрый Мядзведзеў у сераду пасля перамоваў з прэзідэнтам Украіны Віктарам Януковічам.
Ён дадаў, што пры гэтым бакі дамовіліся аб магчымасці падаўжэння знаходжання флоту яшчэ на 5 гадоў.
