Мала нам Бакіева: Менск паралізуе на 4 дні з-за Нгуен Мінь Чыета

Абмежаванні руху транспарту плануюцца на некаторых участках сталічнай вулічна-дарожнай сеткі з 12 па 16 траўня.

Звязана гэта з афіцыйным візітам у Рэспубліку Беларусь прэзідэнта Сацыялістычнай Рэспублікі В'етнам Нгуен Мінь Чыета, паведамілі «Інтэрфаксу» ва УДАІ ГУУС Менгарвыканкама.

12 траўня (прыбыццё):

Прыблізна ў 18.00 быў абмежаваны рух па праспекце Незалежнасці і знешнім кальцы МКАД.

13 траўня:

У раёне 12.00 і 14.00 будзе часова абмежаваны рух па праспекце Пераможцаў і праспекце Незалежнасці;

З 16.00 будзе часова абмежаваны рух па МКАД, праспекце Пераможцаў, плошчы Незалежнасці;

У 19.00 рух усіх тыпаў транспарту будзе абмежаваны ў раёне плошчы Перамогі.

14 траўня:

З 9.30 часова будзе абмяжоўвацца рух транспарту ў раёне плошчы Перамогі і на пад'ездах да яе;

Падчас наведвання дэлегацыяй музея Вялікай Айчыннай вайны ў 16.00 будзе абмежаваны рух па праспектах Пераможцаў і Незалежнасці;

Падчас наведвання дэлегацыяй комплексу «Менск-Арэна» у 17.00 будзе абмежаваны рух па праспекце Пераможцаў, вуліцах Нарачанскай і Праектаванай.

15 траўня:

Падчас наведвання дэлегацыяй мемарыяльнага комплексу «Хатынь» у 9.00 будзе часова абмежаваны рух транспарту па МКАД у накірунку Лагойскай шашы.

16 траўня (адбыццё) :

З 8.00 часова будзе абмяжоўвацца рух транспарту на маршруце МКАД – праспект Незалежнасці – Маскоўская шаша – аэрапорт Менск-2.

Дзяржаўтаінспекцыя заклікае ўсіх удзельнікаў дарожнага руху паставіцца да часовых абмежаванняў з разуменнем і просіць загадзя планаваць маршруты руху, па магчымасці выключаючы вуліцы і праспекты, на якіх плануюцца перакрыцці.

Нагадаем, што з-за перасоўванняў па Менску самога Аляксандра Лукашэнкі і яго «спецыяльнага госця» збеглага прэзідэнта Кыргызтана Курманбека Бакіева ў сталіцы ўвесь час перакрываецца рух.