На кансультацыі аб беларускай АЭС грамадскасць не запрасілі

Кансультацыі па справаздачы аб ацэнцы ўздзеяння на навакольнае асяроддзе (АУНА) будучай беларускай АЭС праходзяць у Варшаве ў закрытым фармаце.

Як паведаміла БелаПАН галоўны спецыяліст упраўлення дзяржаўнай экалагічнай экспертызы Міністэрства прыродных рэсурсаў і аховы навакольнага асяроддзя Ганна Клют, беларускі бок на кансультацыях прадстаўлены толькі афіцыйнымі ворганамі: спецыялістамі Мінпрыроды і Мінэнергетыкі, ДУ «Дырэкцыя будаўніцтва атамнай станцыі», Дзяржаўнага навукова-практычнага цэнтра гігіены, Рэспубліканскага навукова -даследчага унітарнага прадпрыемства «Інстытут радыялогіі». У складзе дэлегацыі Польшчы - прадстаўнікі Нацыянальнага агенцтва па атамнай энергіі, Генеральнага дырэктарата па ахове навакольнага асяроддзя, рэгіянальных дырэктарата па ахове навакольнага асяроддзя ў Любліне і Беластоку, адміністрацый Люблінскага і Беластоцкага ваяводстваў.

Прадстаўнікі беларускай грамадскасці запрошаныя не былі.

Па словах Ганны Клют, беларускаму боку таксама трэба будзе правесці кансультацыі па справаздачы аб АУНА будучай беларускай АЭС з украінскімі і літоўскімі спецыялістамі. Кансультацыі з украінскай бокам запланаваныя на 31 траўня. На іх будуць абмяркоўвацца ў тым ліку адказы беларускага боку на заўвагі, зробленыя прадстаўнікамі Украіны падчас грамадскіх слуханняў па АУНА беларускай АЭС у Кіеве 31 сакавіка.

Як паведаміла Клют, дата правядзення кансультацый з літоўскімі спецыялістамі яшчэ абмяркоўваецца. Верагодна, яны будуць праведзеныя ў пачатку чэрвеня.

Грамадскія слуханні па АУНА беларускай АЭС прайшлі ў Вільні 2 сакавіка, пры гэтым прадстаўнікі літоўскай грамадскасці не прызналі іх легітымнасьць.

На «грамадскія слуханні» у Беларусі не былі дапушчаныя шматлікія прадстаўнікі грамадскасці і незалежныя эксперты, а расейскі эксперт Андрэй Ажароўскі нават быў арыштаваны на 7 сутак за спробу пранесці на слуханне крытычныя заўвагі па АУНА.