Саакашвілі: Я не пайду на трэці тэрмін, Грузія не будзе «бандустанам»
29- 14.06.2010, 16:38
Прэзідэнт Грузіі Міхаіл Саакашвілі заявіў, што не збіраецца ў трэці раз балатавацца на пасаду прэзідэнта пасля заканчэння свайго другога прэзідэнцкага тэрміна.
«Грузія ніколі не будзе нейкім «бандустанам», дзе канстытуцыя і законы напісаныя пад аднаго канкрэтнага чалавека», - падкрэсліў грузінскі лідэр.
Пры гэтым прэзідэнт адзначыў, што для яго далёка не абыякава, хто прыйдзе да ўлады ў 2013 годзе, бо распачатыя пры ім рэформы павінны быць завершаныя.
«Вядома ж, з'явіцца новы лідэр, вядома ж, у Грузіі будзе новы прэзідэнт. Я хацеў бы, каб каманда цяперашніх рэфарматараў працягнула дзейнасць, але я жадаў бы таксама, каб гэтыя рэформы падзялялі і іншыя палітычныя партыі, каб іх прыход ва ўладу не стаў бы трагедыяй для дзяржавы», - падагульніў Саакашвілі.
Як паведамляў раней ru.DELFI.lt, 26 траўня Грузія адзначала Дзень незалежнасці.
«Грузія і незалежнасць - гэта не простыя словы, гэта тое - за што варта жыць, дыхаць, вучыцца, працаваць, ствараць новыя рэчы, і гэта тое, за што можна памерці», - заявіў Саакашвілі.
