Рассельгаснагляд будзе шукаць радыяцыю ў беларускім мясе

Па інфармацыі ведамства, у Беларусі асвойваюць зямлю, забруджаную радыёактыўнымі выкідамі Чарнобыльскай АЭС.

Федэральная служба па ветэрынарным і фітасанітарным наглядзе плануе праводзіць маніторынг радыёлагічных паказчыкаў бяспекі мясной прадукцыі з Беларусі, перадае «Інтэрфакс».

«Па наяўнай інфармацыі ў цяперашні час сельгасвытворцы Рэспублікі Беларусь пачынаюць асвойваць зямельныя ўгоддзі, якія раней не выкарыстоўваліся ў сувязі з забруджваннем радыёактыўнымі выкідамі Чарнобыльскай АЭС», - паведамляецца ва ўказанні Рассельгаснагляду сваім тэрытарыяльным органам.

Ведамства мяркуе, што «пашырэнне сыравіннай базы жывёлагадоўлі можа стаць прычынай траплення радыёактыўных ізатопаў праз харчовы ланцуг у гатовую прадукцыю жывёльнага паходжання».

Для кантролю бяспекі прадукцыі жывёльнага паходжання Рассельгаснагляд мае намер праводзіць радыёлагічныя даследаванні ў межах маніторынгу прадукцыі з Украіны, Беларусі і Казахстана.