«Газпрам» павялічвае кошт на газ для Беларусі

У 2011 годзе Беларусь павінна плаціць па 250 даляраў за кубаметр, што на 67% больш за кошт, па якім аплачвае газ сёлета.

ААТ «Газпрам» гатовы заключыць з ААТ «Белтрансгаз» дамову аб пастаўцы ў Беларусь у 2011 годзе газу ў аб'ёме не больш за 22,5 млрд кубаметраў на агульную гранічную суму $5,625 млрд, сказана ў матэрыялах да гадавога сходу акцыянераў «Газпрама», перадае «Інтэрфакс».

Такім чынам, сярэдні кошт газу Беларусі ў 2011 годзе можа скласці $250 за 1 тыс. кубаметраў, што на 35-39% больш за сярэднегадавы кошт ў 2010 годзе ($180-185 за 1 тыс.кубаметраў) і на 67% больш за кошт, па якім «Белтрансгаз» фактычна аплачвае газ сёлета.

Як паведамлялася, у адпаведнасці з 4-гадовым кантрактам на пастаўку газу ў Беларусь, з 2011 года «Белтрансгаз» павінен купляць газ па раўнадаходным кошце, гэта значыць сярэднееўрапейскі за вылікам экспартнай пошліны і з улікам меншага транзітнага пляча. Кантрактам прадугледжаны паэтапны выхад на раўнадаходны кошт праз ужыванне паніжальных каэфіцыентаў да кошту на газ у папярэднія гады. Так, у 2010 годзе гэты каэфіцыент складае 0,9, у 2009-м годзе - 0,8, у 2008-м годзе - 0,7.

У адпаведнасці з дамоўленасцямі на вышэйшым узроўні, у 2009 годзе для Беларусі быў захаваны каэфіцыент 2008 года - 0,7. Сёлета беларускі бок разлічвае на захаванне такога ж каэфіцыента, матывуючы сваю пазіцыю адмовай Расеі ад падвышэння ўнутрырасейскіх коштаў на газ да раўнадаходнага ўзроўня з 2011 года, як гэта планавалася пры заключэнні 4-х гадовага кантракту ў снежні 2006 года.

У выніку, Беларусь з пачатку гэтага года плаціць за газ па $150 за 1 тыс.кубаметраў пры тым, што кантрактны кошт у I квартале 2010 года склаў $169 за 1 тыс. кубаметраў, у II квартале - $184 за 1 тыс. кубаметраў.

«Газпрам» заявіў пра запазычанасць Беларусі ў суме $192 млн і асцерагаецца яе росту да $500-600 млн да канца гэтага года.

«Газпраму» належыць 50% ААТ «Белтрансгаз», назіральны савет якога з сакавіка гэтага года ўзначальвае намеснік старшыні «Газпрама» Валеры Голубеў.

У матэрыялах да сходу акцыянераў таксама сказана, што «Белтрансгаз» у 2011 годзе аказвае паслугі па транспартаванні газу ў рэжыме транзіту па тэрыторыі Беларусі па газатранспартнай сістэме ААТ «Белтрансгаз» і па беларускім участку расейскага газаправода «Ямал - Еўропа» ў аб'ёме не больш за 48,2 млрд куб. м, а ААТ «Газпрам» аплачвае паслугі па транспартаванні газу па магістральных газаправодах на агульную гранічную суму $600 млн.