У Беларусі распачалі фармаванне «чорнага спісу» сайтаў

На сайце Інспекцыі па электрасувязі (БелДІЭ) з'явілася раздзел «Спісы абмежаванага доступу».

Гэтыя спісы па задуме распрацоўшчыкаў указу №60 засцерагуць беларускіх інтэрнэт-карыстальнікаў па іх патрабаванні ад экстрэмізму, гвалту, парнаграфіі і іншых празмернасцяў. Згодна з сумеснай пастановай ААЦ і Мінсувязі такіх спісаў будзе два - публічны і закрыты. У першы ўвойдуць інтэрнэт-рэсурсы, зарэгістраваныя ў нацыянальным сегменце сеткі Інтэрнэт, а ў другі, які будзе бачны толькі пастаўшчыкам інтэрнэт-паслугаў - астатнія непажаданыя інтэрнэт-рэсурсы, паведамляе Electroname.com.

БелДІЭ прапануе інтэрнэт-правайдэрам прайсці квэст і атрымаць доступ да спісу абмежаванага доступу. Для гэтага трэба аформіць ліст і перадаць яго ў БелДІЭ праз упаўнаважаную асобу. Упаўнаважаная асоба павінна паказаць завераную ліцэнзію на права ажыццяўлення дзейнасці ў галіне сувязі. Толькі тады можна атрымаць лагін і пароль для доступу да спісу абмежаванага доступу праз САЙТ РУП «БелДІЭ».

Нагадаем, «чорны спіс» фармуецца БелДІЭ па прапанове ўпаўнаважаных дзяржорганаў. Дапамагчы ў складанні спісу могуць юрасобы, індывідуальныя прадпрымальнікі і звычайныя грамадзяне, якія павінны накіроўваць свае прапановы па блакаванні сайтаў у дзяржорганы. Пакуль інтэрнэт-цэнзура можа ажыццяўляцца толькі па асабістай просьбе самога інтэрнэт-карыстальніка. У абавязковым парадку непажаданыя сайты будуць блакавацца ў дзяржустановах, а таксама ў арганізацыях адукацыі, культуры.

Скандальны ўказ Аляксандра Лукашэнкі «Аб нацыянальным сегменце сеткі Інтэрнэт» набыў сілу 1 ліпеня. Тэкст указа выклікаў крытыку як беларускай медыя-супольнасці, так і міжнародных праваабарончых арганізацыяў, у тым ліку АБСЕ. Незалежныя эксперты не сумняюцца, што ўказ Лукашэнкі накіраваны, у першую чаргу, на блакаванне апазіцыйных вэб-рэсурсаў падчас правядзення выбараў.