Міліцыянты адкрылі стральбу па выкрадальніках кукурузы

У Жыткавічах міліцыянты адкрылі стральбу па мікрааўтобусе з крадзенай кукурузай і паранілі аднаго з ўцекачоў.

- Ад кіраўніцтва ААТ «Тураўшчына» паступіла інфармацыя, што ўначы з поля прадпрыемства будуць выкрадаць кукурузу. Супрацоўнік РАУС, узброіўшыся прыборам начнога бачання, адправіўся ў гаспадарку. Неўзабаве заўважыў мікрааўтобус з выключанымі фарамі, які ехаў па полі, і выклікаў падмацаванне, - распавёў «Комсомольской правде в Беларуси» следчы пракуратуры Гомельскай вобласці па Жыткавіцкім раёне Сяргей Ілліч.

На выездзе з поля міліцыянты спрабавалі спыніць машыну, але выкрадальнікі кукурузы праскочылі міма. І пачаўся пераслед. Мікрааўтобус панёсся па вуліцах Турава, на патрабаванні спыніцца не рэагаваў. У адказ на спробы абагнаць і прыціснуць да ўзбочыны віляў у бакі. Пры выездзе з горада міліцыянты папярэдзілі аб выкарыстанні зброі, зрабілі тры папераджальныя стрэлы, але зламыснікі зноў не адрэагавалі. Пачаўся прыцэльны агонь па мікрааўтобусе. Пасля таго як кола было прабіта, кіроўца рэзка звярнуў на ўзбочыну і выкрадальнікі выскачылі з машыны.

Грузавы адсек буса быў цалкам забіты пачаткамі, а на іх міліцыянты ўбачылі вялікія плямы крыві. Калі злодзеяў здагналі, высветлілася, што адзін з іх паранены ў нагу. Куля прайшла вышэй за кола, прабіла кузаў. Параненаму выклікалі «хуткую», зараз яго жыццё па-за небяспекай. Да міліцыянта, які страляў, у пракуратуры прэтэнзіяў няма.