Электраэнергія і цяпло для прамспажыўцоў сталі даражэйшымі на 20,9%
17- 20.08.2010, 16:31
Падаражанне абгрунтоўваецца «неабходнасцю стабілізацыі разлікаў за пастаўляльны прыродны газ».
У Беларусі з 20 жніўня тарыфы на электрычную і цеплавую энергію для прамспажыўцоў павялічаныя на 20,9%, паведамілі агенцтву «Інтэрфакс-Захад» у міністэрстве эканомікі рэспублікі.
«З мэтай стабілізацыі разлікаў за пастаўляльны прыродны газ з 20 жніўня 2010 павялічваюцца на 20,9% тарыфы на электрычную і цеплавую энергію, якая адпускаецца рэспубліканскімі ўнітарнымі прадпрыемствамі электраэнергетыкі ДВА «Белэнерга» для юрыдычных асоб і індывідуальных прадпрымальнікаў», - растлумачылі ў Мінэканомікі.
Як раней паведамлялася, у Беларусі пастановай Мінэканомікі з 11 жніўня на 13,2% былі павялічаныя кошты на прыродны газ для юрыдычных асоб і індывідуальных прадпрымальнікаў - да Br716 тыс. за 1 тыс. кубаметраў без уліку падатку на дададзены кошт.
У Мінэканомікі звярнулі ўвагу, што неабходнасць перагляду цэнаў на прыродны газ для юрасоб і ІП узнікла «ў сувязі з падаражэннем кошту набыцця прыроднага газу ў Расейскай Федэрацыі, а таксама змяненняў агульных эканамічных умоваў гаспадарання».
Як паведамлялася, Беларусь пасля нядаўняй «газавай вайны» была вымушаная плаціць за газ кантрактную цану, а не $150, як у 1 паўгоддзі. Акрамя таго, 2 ліпеня 2010 г. «Газпром» і «Белтрансгаз» падпісалі дадпагадненне да кантракту, якое прадугледжвае падвышэнне «Белтрансгазам» унутранай аптовай надбаўкі на газ з $10,47 да $11,09 за тысячу кубаметраў з 1 студзеня 2010 года.
Падвышэнне ўнутранай аптовай надбаўкі зроблена ў адпаведнасці з дадпагадненнем, якое таксама прадугледжвае павелічэнне стаўкі за транзіт расейскага газу па тэрыторыі Беларусі з 1 студзеня 2010 года да $1,88 з $1,45 за тысячу куб. м.
Раней эксперты лічылі непазбежным падвышэнне ўнутраных коштаў на газ з 1 ліпеня бягучага года з-за таго, што ў III квартале кошт імпарту газу вырас да $193-194 за тысячу кубаметраў супраць $169 у I квартале і $185 у другім квартале бягучага года. Між тым, паводле экспертных ацэнак, кошт на газ мог вырасці не больш чым на 10%.
