Лукашэнка: «П'янства - гэта раскоша»

Беларускі кіраўнік прапаноўвае ўзмацніць жорсткасць адказнасці кіроўцаў за язду ў нецвярозым стане.

Задачу прапрацаваць гэтае пытанне ён паставіў 13 верасня на нарадзе па ўнясенні паправак ў Правілы дарожнага руху, паведамілі БелТА ў яго прэс-службе.

У прыватнасці, Лукашэнку быў прадстаўлены праект указа «Аб унясенні дапаўненняў і змяненняў у Правілы дарожнага руху».

Як адзначыў кіраўнік, пытанні забеспячэння бяспекі дарожнага руху наўпрост закранаюць правы і законныя інтарэсы практычна ўсяго насельніцтва краіны. А таму ў сувязі з важнасцю гэтых пытанняў яшчэ ў 2005 годзе было прынятае рашэнне аб зацвярджэнні Правілаў дарожнага руху на ўзроўні Прэзідэнта. «Чаму гэта было зроблена? Тады было сказана, што Правілы дарожнага руху - сур'ёзная рэч, карэктаваць іх няхай нават такому сур'ёзнаму ведамству, як МУС, ці каму-небудзь яшчэ, нельга. І пасля сканчэння пяці гадоў я пераконваюся, што гэтае рашэнне было правільным», - адзначыў ён.

У прыватнасці, Лукашэнка лічыць мэтазгодным перагледзець нормы правілаў, якія датычаць кіравання транспартным сродкам у стане алкагольнага ці наркатычнага ап'янення. «Шмат людзей гіне на дарогах з прычыны п'янства. Вось гэтага быць не павінна!» - падкрэсліў ён.

На яго думку, за такія правапарушэнні неабходна строга караць. «За п'янкі трэба караць найсур'ёзнейшым чынам. Таму што гэта, напэўна, галоўная прычына ўсіх бедаў на дарозе», - запатрабаваў кіраўнік.

Лукашэнка даручыў яшчэ раз дэталёва разгледзець усе нормы ПДР, датычныя дапушчальнага ўзроўню алкаголю ў крыві. «Давайце да гэтага вернемся, але толькі аб'ектыўна. П'янства - гэта раскоша для вадзіцеля! Пытацца трэба жорстка!» - сказаў ён.

Кіраўнік даручыў дапрацаваць праект указа з улікам выказаных заўвагаў. Ён таксама ўказаў на неабходнасць больш актыўнай працы з насельніцтвам, шырокага інфармавання аб усіх прапанаваных у ПДР новаўвядзеннях праз сродкі масавай інфармацыі.