Зборная Беларусі прайграла Францыі на баскетбольным ЧС

У першым матчы другога групавога раўнда ў кваліфікацыйнай групе E Чэмпіянату свету па баскетболе жаночая зборная Беларусі прайграла камандзе Францыі.

Падапечныя Анатоля Буяльскага саступілі з лікам 48:58 (08:14, 12:11, 17:11, 11:22).

Самай выніковай сярод беларусак стала Алена Леўчанка (17 ачкоў), на рахунку Анастасіі Верамеенка і Таццяны Троінай па 10 і 9 ачкоў адпаведна, піша «Прэсбол».

«Такія відовішчныя гульні заўсёды падабаюцца балельшчыкам. Таму як мінімум магу парадавацца за гледачоў. Беларускай іх частцы прыношу выбачэнні за страты, якія, магчыма, каштавалі нам перамогі. Французская каманда добра нас вывучыла і выдатна падрыхтавалася - у шэрагу момантаў яны выглядалі лепш. Напэўна, таму і перамаглі. Мы дапусцілі шэраг памылак у абароне, якімі скарысталіся суперніцы. У дадатак не змаглі рэалізаваць абавязковы мінімум кідкоў, які мелі. Спадзяюся, выправіцца ў далейшых гульнях. А з францужанкамі яшчэ паквітаемся. Хто ведае, можа, нават у фінале гэтага чэмпіянату свету!», - кажа Наталля Марчанка.

У іншым матчы групы Е зборная Аўстраліі абгуляла грэчаскіх баскетбалістак - 93:54.

Сёння, 28 верасня, каманда Беларусі згуляе са зборнай ЗША.