Наталлю Радзіну абвінавацілі ў арганізацыі «масавых беспарадкаў»?

Ледзь прыкметная мяжа паміж БТ і КДБ знікла. Цяпер тэлевізар замест следчага і адваката паведамляе аб прад'яўленні абвінавачванняў.

Так, Наталля Радзіна, рэдактарка ​​сайта charter97.org, даведалася аб прад'яўленні «абвінавачвання ў арганізацыі масавых беспарадкаў» з чарговага прапагандысцкага фільма тэлеканала СТВ. Адвакат журналісткі аб удакладненні абвінавачвання нічога не ведае.

Даслоўна гаворачая галава на СТВ сказала наступнае:

«Абвінавачванне ў арганізацыі масавых беспарадкаў ўжо прад'яўленае Саннікаву, Усу і Статкевічу. Дарэчы, пасля знаёмства з матэрыяламі справы апошні не выказаў сумневаў у доказнасці сваёй віны. Такое ж абвінавачанне прад'явілі і рэдактарцы апазыцыйнага інтэрнэт-сайта Наталлі Радзінай. Зараз яна ў Кобрыне пад падпіскай аб нявыездзе. Дарэчы, сам факт ейнага затрымання выклікаў самую што ні на ёсць крытычную рэакцыю Захаду. А вестка аб вяртанні вядомай журналісткі дадому ўпала на невялікі гарадок як снег на галаву...»

Да гэтага часу журналістка, якая больш за месяц правяла ў СІЗА КДБ, а цяпер знаходзіцца ў «спасылцы» ў 300 кіламетрах ад Менска пад падпіскай аб нявыездзе, абвінавачвалася па двух частках артыкула 293 КК РБ. Канчатковага абвінавачванні ёй яшчэ не прад'яўлялі. Ва ўсякім выпадку, афіцыйна. І узнікае пытанне: СТВ, як заўсёды, перакручвае або прагаварылася?